Ordu.az xəbər verir ki, qərar NATO müdafiə nazirlərinin toplantısından əvvəl Almaniyanın müdafiə naziri Boris Pistorius tərəfindən elan edilib.

Pistoriusun sözlərinə görə, 400 milyon dollarlıq paketin 200 milyon dolları NATO müttəfiqlərinin Ukrayna üçün ABŞ istehsalı silah və sursatların alınmasını maliyyələşdirməsinə imkan verən Ukraynanın Prioritet Ehtiyaclar Siyahısı (PURL) proqramı çərçivəsində təmin olunacaq.

Qalan 200 milyon dollar isə ABŞ-nin Xarici Hərbi Satışlar (FMS) sistemi daxilində həyata keçirilən JUMPSTART proqramı vasitəsilə ayrılacaq. Beləliklə, Almaniya PURL mexanizminə artıq dördüncü dəfə maliyyə töhfəsi vermiş olacaq.

Ayrılan vəsaitin əsas hissəsinin “Patriot” hava hücumundan müdafiə sistemlərində istifadə olunan PAC-3 önləyici raketlərinin alınmasına yönəldilməsi planlaşdırılır. PAC-3 raketləri əsasən ballistik raket təhdidlərinə qarşı hazırlanıb və “Patriot” sistemlərinin ən qabaqcıl önləyici sursatları sırasında yer alır.

Pistorius Ukraynaya dəstək verən ölkələrə müraciət edərək PAC-3 raketlərinin alınması üçün əlavə maliyyə ayrılmasına çağırış edib.

Berlin Ukraynanın Rusiyanın intensiv raket hücumlarına qarşı hava hücumundan müdafiə şəbəkəsini gücləndirmək məqsədilə daha çox ölkənin bu təşəbbüsə qoşulmasını istəyir.

Daha əvvəl “Bloomberg”in yaydığı məlumata görə, Ukrayna Almaniya inventarında olan “Patriot” sistemləri üçün onlarla əlavə önləyici raket istəyib. Məlumata əsasən, üzərində işlənilən mexanizm çərçivəsində Ukraynanın ehtiyac duyduğu raketlər qısa müddətdə təhvil verilə bilər.

Bundan başqa, Almaniyanın Norveçin “Kongsberg Defence & Aerospace” şirkəti tərəfindən hazırlanan NOMADS hava hücumundan müdafiə sistemlərinin Ukrayna üçün alınmasını da maliyyələşdirdiyi bildirilir.

Almaniyanın Ukrayna üçün NOMADS sistemlərinin alınması planları ilk dəfə 2024-cü ildə gündəmə gəlmişdi. “Kongsberg” isə sistemi 2026-cı ildə tammiqyaslı seriya istehsal mərhələsinə çıxarıb.

Sevinc Əliyeva
Ordu.az