Ordu.az xəbər verir ki, ABŞ-nin vitse-prezidenti bu barədə iyunun 18-də Ağ Evdə keçirilən brifinq zamanı danışıb.
Vens bildirib ki, ABŞ İranın hərbi potensialına, o cümlədən raket infrastrukturuna ciddi zərbə vurub.
Onun sözlərinə görə, İranın çoxlu sayda ballistik raketi və onların buraxılış qurğuları məhv edilib.
“Biz onların ballistik raketlərinin və həmin raketlərin buraxılış qurğularının əhəmiyyətli hissəsini məhv etmişik. Söhbət təkcə “güllələrdən” deyil, həm də həmin “silahlardan” gedir və bu istiqamətdə son dərəcə effektiv fəaliyyət göstərmişik”, - deyə Vens bildirib.
ABŞ-nin vitse-prezidenti vurğulayıb ki, Vaşinqton əldə olunmuş razılaşma çərçivəsində İranın qlobal təhlükəsizliyə təhdid yarada biləcək raketlər istehsal edə bilməyəcəyini əsas götürür.
“Biz gözləyirik ki, İran bütün dünya üçün genişmiqyaslı təhlükə yarada biləcək raketlər istehsal etmək imkanına malik olmayacaq”, - deyə o qeyd edib.
Vens əlavə edib ki, ABŞ-nin hazırkı yanaşması regionda sabitliyi pozan fəaliyyətlərin qarşısını almağa yönəlib.
“Biz istəyirik ki, İran regional qeyri-sabitliyi maliyyələşdirməsin, terrorçuluğa dəstək verməsin və əlbəttə ki, nüvə proqramını yenidən bərpa etməyə çalışmasın”, - deyə ABŞ rəsmisi bildirib.
O, həmçinin razılaşma ətrafında aparılan siyasi müzakirələrə də münasibət bildirib. Vens Donald Trampın razılaşmanın uğursuz olacağı təqdirdə məsuliyyəti onun üzərinə atacağı ilə bağlı zarafatına toxunaraq bunun ciddi bəyanat olmadığını deyib.
“Xeyr, qətiyyən. Düşünürəm ki, Prezident tez-tez etdiyi kimi yenə zarafat edirdi”, - deyə Vens bildirib.
ABŞ-nin vitse-prezidenti əlavə edib ki, administrasiya yaxın vaxtlarda ABŞ Konqresinə İranla imzalanmış anlaşma memorandumunun məzmunu barədə rəsmi məlumat verəcək.
Onun sözlərinə görə, qanunvericilər həmin gün imzalanmış sənədin rəsmi nüsxəsini əldə edəcəklər.
Vens qeyd edib ki, Konqres üzvləri ilə qeyri-rəsmi təmaslar artıq baş tutub, lakin bundan sonra proses rəsmi mərhələyə keçəcək.
O bildirib ki, Konqresdə razılaşmaya münasibətdə fikir ayrılıqları qalmaqdadır. Respublikaçı senatorların bir hissəsi sənədi riskli və baha başa gələn addım kimi qiymətləndirir, digərləri isə administrasiya nümayəndələri ilə məsləhətləşmələrdən sonra ehtiyatlı dəstək nümayiş etdiriblər.
Sevinc Əliyeva
Ordu.az
