Ordu.az xəbər verir ki, Finlandiyanın müdafiə naziri Antti Hekkanen ölkənin Müdafiə Qüvvələrinin Logistika Komandanlığına bu sursatların alınması üçün səlahiyyət verib.
Yeni sursatlar Finlandiya Hərbi Hava Qüvvələrinin yaxın illərdə silahlanmaya qəbul ediləcək F-35A qırıcılarında istifadə olunacaq.
Finlandiya Müdafiə Nazirliyi və Müdafiə Qüvvələrinin yaydığı məlumata görə, GBU-53 SDB II sursatları mövcud F-35 silah paketinə əlavə ediləcək və ölkənin “hava-yer” zərbə imkanlarını əhəmiyyətli dərəcədə artıracaq.
GBU-53 SDB II orta məsafədən yüksək dəqiqliklə nişanalma həyata keçirə bilən yeni nəsil planerləşən idarəolunan sursat hesab olunur.
Sistem çətin hava şəraitində və hərəkətdə olan hədəflərə qarşı effektiv tətbiq edilə bilir. Bu xüsusiyyət Finlandiya Hərbi Hava Qüvvələrinə indiyədək malik olmadığı yeni əməliyyat imkanları qazandıracaq.
Finlandiyanın F-35 proqramının direktoru, ehtiyatda olan polkovnik Henrik Elo bildirib ki, alınan planerləşən yüksək dəqiqlikli sursatlar daha əvvəl sifariş verilmiş F-35 silah paketini tamamlayacaq.
Onun sözlərinə görə, SDB II texnoloji baxımdan son dərəcə qabaqcıl sistemdir və Finlandiya Hərbi Hava Qüvvələrinin daha əvvəl malik olmadığı imkanları F-35 donanmasına qazandıracaq.
SDB II-nin kompakt quruluşu sayəsində F-35A qırıcıları eyni vaxtda daha çox sursat daşıya biləcək.
Henrik Elo qeyd edib ki, sursatın əlverişsiz hava şəraitində belə hərəkətli hədəfləri vurmaq qabiliyyəti F-35 qırıcılarının çoxsahəli əməliyyat konsepsiyası çərçivəsində quru, hava və dəniz qüvvələri ilə daha səmərəli fəaliyyət göstərməsinə imkan yaradacaq.
Tədarük Finlandiyanın HX Döyüş Təyyarəsi Proqramı çərçivəsində ABŞ ilə həyata keçirdiyi F-35A satınalma prosesinin bir hissəsidir.
ABŞ Konqresi daha əvvəl “Raytheon” istehsalı olan GBU-53 SDB II sursatlarının Finlandiyaya satışını təsdiqləmişdi. Yeni sifariş 2023-cü ildə imzalanmış Xarici Hərbi Satışlar (FMS) müqaviləsinə əlavə olaraq həyata keçiriləcək.
Paketə texniki sənədlər, ehtiyat hissələri, aksesuarlar, nəqliyyat xidmətləri, təlim, texniki xidmət və dəstək xidmətləri də daxildir.
Müdafiə naziri Antti Hekkanen bildirib ki, yeni satınalma ölkənin müdafiə qabiliyyətini gücləndirəcək və Finlandiyanın ən çətin şəraitdə belə müdafiə potensialını artıracaq.
Sevinc Əliyeva
Ordu.az
