Ordu.az xəbər verir ki, Köçəryan bu barədə jurnalistlərlə, o cümlədən “News.am”ın müxbiri ilə söhbətində danışıb.
Onun sözlərinə görə, bu, qələbənin “yas mərasimi sifəti ilə” elan edildiyi bir hal olub və bunu həm “Vətəndaş Müqaviləsi” komandasının, həm də şəxsən Nikol Paşinyanın davranışında görmək mümkün idi.
Erməni siyasətçi hesab edir ki, hakim partiya növbəti blefə əl ataraq sonrakı hesablamalara təsir göstərə biləcəyini düşünüb.
“Gecə ərzində Mərkəzi Seçki Komissiyasının nümayiş etdirdiyi qəribə davranış, canlı yayımların dayandırılması və internet saytının vaxtaşırı işləməməsi də bunu göstərirdi. Onlar gecə ərzində istədikləri inandırıcı qələbə mənzərəsini yaratmağa çalışırdılar. Amma reallıq tamamilə fərqlidir. Mən hətta əminəm ki, müxtəlif üsullarla nəticələrə ən azı 10 faiz əlavə ediblər”, - deyə Köçəryan bildirib.
O, əmin olduğunu vurğulayıb ki, bu pozuntular seçkilərin yekun nəticələrinə təsir göstərə bilərdi.
“Şübhəsiz. Seçki prosesi yalnız səsvermə günü deyil. Buraya seçkiqabağı kampaniya və ondan əvvəlki dövr də daxildir. Bu müddətdə görünməmiş pozuntular baş verib və həmin pozuntuların hər bir bloku yekun nəticələrə təsir göstərə bilərdi”, - deyə müxalifət lideri bildirib.
“News.am”ın hakimiyyətin qələbəsinə nə kömək etdiyi və müxalifətin uğursuzluğuna nəyin səbəb olduğu barədə sualını cavablandıran Köçəryan bir neçə amili sadalayıb.
Onun fikrincə, ən mühüm amil xarici dəstək olub.
“Bu dəstəyin bənzəri olmayıb. ABŞ vitse-prezidentinin, daha sonra Donald Trampın dəstəyi ilə bağlı açıqlamalar, Marko Rubionun yarımsaatlıq mətbuat konfransı ilə müşayiət olunan hava limanı səfəri, Avropa Komissiyası sədrinin bəyanatları, müxtəlif Avropa ölkələri liderlərinin çıxışları, Emmanuel Makronun isə görünməmiş müdaxiləsi baş verdi. Mən siyasətdə böyük təcrübəyə malikəm və belə bir hal heç vaxt olmayıb”, - deyə Ermənistanın ikinci prezidenti vurğulayıb.
Köçəryan hesab edir ki, təkcə bu amil belə yekun nəticələrə təsir göstərə biləcək səviyyədə müdaxilə olduğunu deməyə kifayətdir.
Onun sözlərinə görə, ikinci amil seçki prosesi dövründə büdcədən həyata keçirilən görünməmiş xərclərlə bağlıdır və bunları seçki rüşvəti kimi qiymətləndirmək olar.
Köçəryan xüsusilə büdcədə nəzərdə tutulmayan pensiya artımlarını misal göstərib.
“Əgər bunu planlaşdırırdınızsa, büdcədə nəzərdə tutmalı idiniz. Amma belə olmayıb. Əksinə, vaxtilə Nikol Paşinyan deyirdi ki, pensiyaçının pensiyasına 10 min dram əlavə etsən, onunla nə edəcəyini bilməyəcək”, - deyə erməni siyasətçi qeyd edib.
O, həmçinin bildirib ki, məzuniyyətdə olan baş nazir bir sıra məsələləri operativ şəkildə həll edib və bunu inzibati resurslardan açıq şəkildə istifadə nümunəsi kimi qiymətləndirib.
“Misal üçün, məzuniyyətdə olan baş nazir birdən-birə sürücülük vəsiqələrinin bal sistemi ilə bağlı narazılığı həll edir. Bu, inzibati resursun açıq sui-istifadəsidir və hesab edirəm ki, buna hüquqi qiymət verilməlidir”, - deyə Köçəryan bildirib.
Erməni müxalifət liderinin sözlərinə görə, müxtəlif hesablamalara əsasən, bu proseslərə təxminən 1 milyard dollar sərf olunub və həmin vəsaitin əhəmiyyətli hissəsi büdcədə nəzərdə tutulmayıb.
Köçəryan büdcə təşkilatlarında çalışan şəxslərə göstərilən təzyiqləri də qeyd edib. Onun sözlərinə görə, bu hallar çoxsaylı və geniş yayılmış olub və hətta müşahidəçilər tərəfindən də qeydə alınıb.
Ermənistanın ikinci prezidenti müxalifət nümayəndələrinə qarşı həyata keçirilən həbslər və cinayət təqiblərinə də toxunub.
“Belə miqyas indiyədək olmayıb. Hətta deyərdim ki, Ermənistanda keçirilən bütün əvvəlki seçkiləri birlikdə götürsək, bu seçkilər zamanı olduğu qədər həbs, saxlanılma və cinayət işi olmayıb. Məqsəd müxalifət qərargahlarının fəaliyyətini dağıtmaq və onların işini pozmaq idi. Təkcə bu amil belə seçkilərin legitim hesab olunmaması üçün kifayətdir”, - deyə Köçəryan bildirib.
O vurğulayıb ki, bütün bu amillər birlikdə götürüldükdə seçkilərin legitim hesab edilməsinin mümkün olmadığını göstərir.
Köçəryan Ermənistan Konstitusiya Məhkəməsinə ediləcək müraciətlə bağlı da gözləntilərinin olmadığını bildirib.
“Gözləntim yoxdur. Amma bu prosesi keçməliyik. Çünki Konstitusiya Məhkəməsinin iclasları açıq keçirilir və biz bütün baş verənləri bir daha cəmiyyətimizə göstərə biləcəyik. Gözləntim olmasa da, bütün bunların rəsmiləşdirilməsi üçün müraciət etməliyik”, - deyə erməni siyasətçi əlavə edib.
Alpər Mövludoğlu
Ordu.az
