Ordu.az xəbər verir ki, bu barədə “The Times of Israel” nəşri məlumat yayıb.

Netanyahunun açıqlaması ABŞ və İran arasında davam edən danışıqlar və ABŞ Prezidenti Donald Trampın mümkün razılaşma ilə bağlı nikbin bəyanatları fonunda səsləndirilib.

“İsrailin baş naziri olduğum müddətdə İran nüvə silahına sahib olmayacaq”, - deyə Netanyahu ofisinin yaydığı bəyanatda bildirib.

İsrail hökumət başçısı qeyd edib ki, bu məsələdə onunla Donald Tramp arasında tam qarşılıqlı anlaşma mövcuddur.

“Prezident Trampla mənim aramda bu mövzuda tam razılıq var”, - deyə o vurğulayıb.

Netanyahu həmçinin bildirib ki, 30 ildən artıq müddətdir İranın nüvə proqramına qarşı beynəlxalq mübarizə aparır.

Onun sözlərinə görə, əgər bu fəaliyyət olmasaydı, İran artıq çoxdan İsraili məhv etmək məqsədilə nüvə bombalarına sahib olardı.

Baş nazir əlavə edib ki, Tehran hələ də yəhudi dövlətini məhv etməyə çalışır və bunun qarşısını almaq onun əsas vəzifələrindən biridir.

“İran yəhudi dövlətini məhv etmək istiqamətində çalışır və mən həyatımı bunun qarşısını almağa həsr etmişəm. Mən baş nazir olduğum müddətdə bu baş verməyəcək”, - deyə Netanyahu bildirib.

Sevinc Əliyeva
Ordu.az