Ordu.az xəbər verir ki, bu barədə AFP agentliyi “SITE Intelligence Group” təşkilatına istinadən məlumat yayıb.
SITE-in məlumatına görə, “Handala” adlı qrup bir neçə ay ərzində FTB-yə məxsus PUA-ların qeydə aldığı “hər bir görüntüyə və hər bir şübhəliyə” FPV formatında çıxış əldə etdiyini bildirib.
Hakerlər iddia ediblər ki, həmin PUA-lar terrorla mübarizə əməliyyatları çərçivəsində sifət tanıma və avtomatik nömrə nişanı oxuma sistemləri ilə təchiz olunub.
SITE vasitəsilə yayımlanan bəyanatda qrup futbol üzrə dünya çempionatı ilə bağlı mümkün təhlükələr barədə xəbərdarlıq edib.
“Dünya çempionatında təhlükəsizliyi daha yaxşı gücləndirin. Bəzi komandaları heç sevmirik. Unutmayın ki, FPV PUA-lar hər yerdədir, onlardan birinin nə vaxt komandanızın avtobusunun yaxınlığında görünəcəyini heç vaxt bilmirsiniz”, - deyə təşkilat qrupun bəyanatından sitat gətirib.
Məlumata görə, FTB dünya çempionatının stadionları ətrafında icazəsiz uçuşların qarşısını almaq üçün PUA-lardan istifadə edir. Turnirlə əlaqədar stadionlar və azarkeş zonaları üzərində də PUA uçuşları qadağan edilib.
ABŞ Ədliyyə Nazirliyi daha əvvəl Tehran istiqamətində həyata keçirilən ABŞ-İsrail zərbələrindən sonra İranla əlaqəli qurumların mümkün kibertəhdidləri barədə xəbərdarlıq etmişdi. Həmin zərbələrin Yaxın Şərqdə gərginliyin artmasına səbəb olduğu bildirilirdi.
“Handala” qrupu sındırılmış PUA-lardan əldə edildiyini iddia etdiyi şəkillər və videolar yayımlayıb. Lakin “SITE Intelligence Group” həmin materialların həqiqiliyini şübhə altına alıb.
Təşkilatın məlumatına görə, videolardan biri əslində 2024-cü ilin dekabrında ABŞ polisinin tornado nəticələrinin qiymətləndirilməsi zamanı texnologiyalardan istifadəsini nümayiş etdirmək məqsədilə proqram platforması tərəfindən hazırlanıb.
“Handala” daha əvvəl, mart ayında FTB direktoru Kaş Patelin elektron poçt hesabını sındırdığını və onun şəxsi məlumatlarını yaydığını da iddia etmişdi.
ABŞ Dövlət Departamenti isə bu haker qrupunun üzvlərinin şəxsiyyətinin müəyyənləşdirilməsinə kömək edəcək məlumat üçün 10 milyon dollaradək mükafat vəd edib.
Sevinc Əliyeva
Ordu.az
