Ordu.az xəbər verir ki, bu barədə Sinqapurda keçirilən 23-cü Şanqri-La Dialoqu çərçivəsində baş tutan müdafiə nazirlərinin səhər yeməyi formatında keçirilən görüşündən sonra məlumat verilib.

Görüş zamanı nazirlər xüsusilə humanitar yardım və təbii fəlakətlərin nəticələrinin aradan qaldırılması sahəsində birgə təlim və məşqlərin artırılmasının vacibliyini vurğulayıblar.

Onlar həmçinin ASEAN-ın mərkəzi rolunun və təşkilatın regional sülhün, sabitliyin və rifahın təşviqindəki əhəmiyyətinin qorunmasını bir daha təsdiqləyiblər.

Sinqapur Müdafiə Nazirliyinin məlumatına görə, tərəflər 2026-cı ilin sentyabrında keçiriləcək və ASEAN Müdafiə Nazirləri Görüşü Plus (ADMM-Plus) ölkələrinin iştirak edəcəyi İndoneziyanın “Exercise Trident Resolve” təlimi kimi təşəbbüslər vasitəsilə əməkdaşlığın genişləndirilməsini müzakirə ediblər.

Bundan əlavə, Sinqapur Hərbi Dəniz Qüvvələrinin İnformasiya Birləşdirmə Mərkəzi kimi platformalar vasitəsilə məlumat mübadiləsinin artırılması məsələsinə də toxunulub.

“Nazirlər ADMM və ADMM-Plus çərçivəsində əməkdaşlığın gücləndirilməsi üçün səyləri ikiqat artırmaq barədə razılığa gəliblər”, - deyə nazirliyin bəyanatında bildirilib.

Görüşə Sinqapurun müdafiə naziri Çan Çun Sinq və Filippinin milli müdafiə naziri Gilberto Teodoro birgə sədrlik edib. Tədbirdə ASEAN-a üzv ölkələrin müdafiə rəhbərləri və nümayəndələri iştirak ediblər.

İştirakçılar arasında Malayziyanın müdafiə naziri Datuk Seri Məhəmməd Xalid Nordin də olub. Nazirlər beynəlxalq hüququn və normaların, xüsusilə də BMT-nin Dəniz Hüququ Konvensiyası çərçivəsində tranzit keçid hüququnun qorunmasının vacibliyini vurğulayıblar.

Onlar həmçinin Malakka və Sinqapur boğazları da daxil olmaqla beynəlxalq hava və dəniz yollarının açıq, təhlükəsiz və etibarlı saxlanmasının qlobal ticarət və təchizat zəncirlərinin fasiləsiz fəaliyyəti üçün vacib olduğunu bildiriblər.

Sevinc Əliyeva
Ordu.az