Ordu.az xəbər verir ki, müqavilə İdarəolunan Yaylım Atəşli Raket Sistemi (GMLRS) üçün vacib komponentlərin Avstraliyada istehsalını nəzərdə tutur.
Bu addım Kanberranın yerli idarəolunan silah sənayesi yaratmaq və müdafiə təchizat zəncirində Avstraliya istehsalı olan komponentlərin payını artırmaq strategiyasının tərkib hissəsi hesab olunur.
GMLRS komponentləri Avstraliyada istehsal ediləcək
“Lockheed Martin Australia” layihənin ilk mərhələsində Melburnda yerləşən “Moog Australia” və “AW Bell” şirkətləri ilə əməkdaşlıq edəcək. Bu çərçivədə “Moog Australia” GMLRS raketinin uçuş zamanı istiqamətləndirilməsini təmin edən İdarəetmə Aktivləşdirmə Sistemini hazırlayacaq və istehsal edəcək.
Bu sistem raketin uzaqmənzilli hədəfləri yüksək dəqiqliklə vurmasında mühüm rol oynayır. “AW Bell” isə raketin xarici idarəetmə səthləri olan kanardların və İdarəetmə Aktivləşdirmə Sistemi korpusunun istehsalına cavabdeh olacaq. Şirkətin artıq sınaq məqsədli prototip kanardlar hazırladığı bildirilib.
Yeni iş yerləri və ixrac imkanları
“Lockheed Martin Australia”nın Raket və Atəşə Nəzarət Sistemləri üzrə direktoru və baş meneceri Ceyms Heddinq bildirib ki, müqavilə Avstraliyanın müdafiə sənayesi imkanlarını daha da gücləndirəcək. “Əsl milli imkanların formalaşdırılması üçün bu iki dünya səviyyəli təchizatçı ilə işləməyə davam etməkdən məmnunuq”, - deyə o bildirib.
Heddinq qeyd edib ki, “AW Bell” və “Moog” müdafiə sənayesi üçün yüksək dəqiqlikli komponent və sistemlərin istehsalında güclü nüfuza malikdir. Onun sözlərinə görə, “Lockheed Martin Australia” ilə həyata keçirilən əməkdaşlıq gələcək layihələr və ixrac imkanları üçün yeni qapılar açacaq.
ABŞ ilə texnologiya mübadiləsi aparılacaq
Proqram çərçivəsində Avstraliya və ABŞ mühəndislərinin iştirak edəcəyi mübadilə proqramı da həyata keçiriləcək. Rəsmilər bildiriblər ki, bu proqram sayəsində kritik istehsal bilikləri və texniki təcrübə paylaşılacaq, nəticədə yerli müdafiə sənayesi imkanları uzunmüddətli perspektivdə daha da güclənəcək.
2030-cu ilə qədər 500 milyon dollardan çox sərmayə
Avstraliya hökumətinin 2024-cü il tarixli İdarəolunan Silahlar və Partlayıcı Sursatlar Planına əsasən, 2030-cu ilə qədər bu sahəyə 500 milyon dollardan çox sərmayə yatırılması nəzərdə tutulur. Müdafiə Sənayesi naziri Pat Konroy bildirib ki, müqavilə yerli istehsalın inkişafı istiqamətində mühüm addımdır.
“Bu razılaşma Avstraliya sənayesini dəstəkləyir və dünya səviyyəli imkanların ölkə daxilində yaradılmasına töhfə verir”, - deyə o vurğulayıb. Nazir əlavə edib ki, bu investisiyalar yerli istehsal gücünü artıracaq, yeni iş yerləri yaradacaq və ölkənin milli təhlükəsizliyini gücləndirəcək.
Məqsəd milli raket istehsalı qabiliyyəti yaratmaqdır
“Lockheed Martin Australia” hökumət qurumları, müdafiə təşkilatları, sənaye müəssisələri və akademik dairələrlə birlikdə ölkədə dayanıqlı idarəolunan sursat istehsalı infrastrukturu qurmağı hədəflədiyini açıqlayıb.
Şirkət hesab edir ki, son müqavilə yalnız yerli istehsal imkanlarını artırmayacaq, eyni zamanda Avstraliya şirkətlərinin qlobal müdafiə təchizat zəncirlərinə daha güclü inteqrasiyasına da şərait yaradacaq.
Sevinc Əliyeva
Ordu.az
