Ordu.az “Financial Times” nəşrinə istinadən xəbər verir ki, təşəbbüsü maliyyələşdirən ölkələrin sayı 18-dən 9-a enib.
Buna baxmayaraq, proqram fəaliyyətini davam etdirir, lakin maliyyələşdirmə sahəsində daha ciddi çətinliklərlə üzləşir.
4 milyondan çox sursat göndərilib
2024-cü ildə başladılan təşəbbüs çərçivəsində bu günədək Ukraynaya 4 milyondan çox artilleriya sursatı çatdırılıb.
Çexiya Prezidenti Petr Pavel bildirib ki, təşəbbüs Kiyevə verilən ümumi sursatın təxminən 50 faizini təşkil edir və Ukrayna üçün həyati əhəmiyyət daşıyır.
Məlumata görə, sursatlar dünyanın müxtəlif bölgələrindəki təchizatçılardan əldə olunur.
Hökumət dəyişikliyi prosesə təsir edib
Pavel qeyd edib ki, bəzi ölkələrin təşəbbüsdən ayrılmasının əsas səbəblərindən biri layihənin başladıldığı Çexiyada hökumət dəyişikliyinin baş verməsidir.
Seçkilərdən sonra Petr Fiala hökumətini Baş nazir Andrey Babişin rəhbərlik etdiyi yeni hökumət əvəz edib. Yeni hökumətin fəaliyyətə başlaması ilə Ukraynaya dəstək siyasətində müəyyən dəyişikliklərin yaşandığı bildirilir.
Babiş seçki kampaniyası zamanı sursat təşəbbüsünü dayandıracağını və proqramın kifayət qədər şəffaf olmadığını bəyan etmişdi.
Məsələ NATO sammitində müzakirə oluna bilər
Petr Pavel təşəbbüsdə qalan ölkələrin maliyyə yükünün arta biləcəyinə diqqət çəkərək mövzunun Ankarada keçiriləcək NATO sammitinin gündəliyinə daxil edilməsini təklif edib.
Proqramın gələcəyi ilə bağlı qeyri-müəyyənlik davam edərkən, bəzi ölkələrin artıq Çexiya vasitəsilə deyil, birbaşa öz sursat alışlarını həyata keçirərək Ukraynaya göndərdiyi qeyd olunur.
Almaniya və Skandinaviya ölkələri dəstəyi davam etdirir
Çexiya rəsmiləri təşəbbüsdən ayrılan ölkələrin adlarını açıqlamayıblar. “Financial Times”ın məlumatına görə, Almaniya və bəzi Skandinaviya ölkələri proqramı maliyyələşdirməyə davam edir.
Bununla yanaşı, təşəbbüsün əsas faydalanıcılarından biri olan “Czechoslovak Group” müdafiə şirkəti də proqram çərçivəsində fəaliyyətini davam etdirir. Ukraynanın artan artilleriya sursatı tələbatı nəzərə alındıqda, təşəbbüsün gələcəyi Avropanın Kiyevə hərbi dəstəyi baxımından əsas məsələlərdən biri hesab olunur.
Sevinc Əliyeva
Ordu.az
