Ordu.az xəbər verir ki, təlim zamanı “Moog”, “Echodyne” və məlumat platforması şirkəti “Picogrid” birgə fəaliyyət göstərib.

Məlumata görə, şirkətlər ABŞ ordusunun inventarında olan qüllə tipli silah stansiyalarının radar, süni zəka dəstəkli hədəfləmə modulu və kənar hesablama kompüterləri əlavə edilməklə inkişaf etmiş antidron sistemlərinə çevrilə biləcəyini nümayiş etdiriblər.

Beləliklə, tamamilə yeni sistemlərin alınması əvəzinə mövcud platformaların modernləşdirilməsi ilə aşağı xərcli və sürətli həll hazırlanması hədəflənir. Qeyd olunub ki, kiçik pilotsuz uçuş aparatları xüsusilə Ukrayna müharibəsində müasir quru döyüşlərinin əsas elementlərindən birinə çevrilib.

Əl qumbarası daşıyan kommersiya pilotsuz uçuş aparatlarından FPV kamikadze sistemlərinə qədər müxtəlif platformalar zirehli texnikalara, logistika karvanlarına və piyada bölmələrinə qarşı geniş istifadə olunur.

Mütəxəssislər 500 dollarlıq pilotsuz uçuş aparatının milyonlarla dollar dəyərində zirehli texnikanı sıradan çıxarmasını müasir müharibələrin ən ciddi asimmetrik təhdidlərindən biri hesab edirlər. Bu səbəbdən aşağı xərcli, sürətli reaksiya verə bilən və kütləvi şəkildə tətbiq edilə bilən antidron həllərinin əhəmiyyəti artır.

“Moog” şirkətinin hazırladığı “RiwP” sistemi mövcud qüllə tipli silah stansiyalarını tam dəyişdirmək əvəzinə onları yeni texnologiyalarla gücləndirməyi nəzərdə tutur. Sistem çərçivəsində “Echodyne” istehsalı olan “EchoShield” radarı, süni zəka əsaslı hədəfləmə modulu və kənar hesablama kompüterləri platformalara inteqrasiya edilir.

Açıq arxitekturaya malik sistemin ABŞ ordusunun müxtəlif platformalarına uzunmüddətli inteqrasiya prosesləri olmadan tətbiq edilə biləcəyi bildirilib. “EchoShield” radarının maşın öyrənməsi əsaslı alqoritmlərlə müxtəlif pilotsuz uçuş aparatlarını təsnifləşdirə və dəqiq mövqe məlumatları yarada bildiyi qeyd olunub.

Əldə edilən məlumatların süni zəka sistemi tərəfindən dərhal atəş həllinə çevrildiyi bildirilib. “Fort Hud” bazasında keçirilən sınaqlarda “Qrup 1”dən “Qrup 3”ə qədər müxtəlif pilotsuz uçuş aparatı təhdidləri yoxlanılıb.

Bu kateqoriyalar bir neçə kiloqram ağırlığında kiçik pilotsuz uçuş aparatlarından 600 kiloqramdan artıq çəkisi olan orta ölçülü sistemlərə qədər geniş spektri əhatə edir. Təlim zamanı sistemin hədəfi aşkarlama, izləmə və məhv etmə prosesinin üç saniyədən az müddətdə həyata keçirildiyi açıqlanıb. Mütəxəssislərin fikrincə, bu reaksiya müddəti yüksək sürətlə yaxınlaşan və sursat daşıyan pilotsuz uçuş aparatlarına qarşı kritik əhəmiyyət daşıyır.

Sistemin passiv aşkarlama, siqnal itkisindən sonra yenidən hədəf izləmə, avtonom hədəfləmə və eyni anda bir neçə hədəfə qarşı fəaliyyət kimi imkanlar nümayiş etdirdiyi bildirilib. Təlim zamanı “Picogrid” şirkətinin hazırladığı “Legion” məlumat platformasından da istifadə olunub.

Sistem vasitəsilə radar, süni zəka hədəfləmə modulu və silah stansiyaları arasında təhlükəsiz hərbi şəbəkə üzərindən real vaxt rejimində məlumat mübadiləsi həyata keçirilib. Müdafiə mütəxəssisləri müxtəlif sensor və silah sistemləri arasında məlumat ötürülməsi gecikmələrinin antidron həllərinin əsas problemlərindən biri olduğunu bildirirlər.

Bu baxımdan “Fort Hud” təlimi şəbəkə mərkəzli döyüş konsepsiyası üçün mühüm mərhələ kimi qiymətləndirilib. “Echodyne” şirkətinin baş icraçı direktoru Eben Frankenberq bildirib ki, yüksək keyfiyyətli radar sensorları və sürətli məlumat inteqrasiyası sayəsində mövcud döyüş meydanı sistemlərindən effektiv antidron qabiliyyəti yaratmaq mümkündür.

Onun sözlərinə görə, bu yanaşma xüsusi hazırlanmış sistemlərlə müqayisədə daha aşağı xərcli və daha sürətli tətbiq olunur. “Moog Defence” bölməsinin baş vitse-prezidenti Mayk Gruver isə pilotsuz uçuş aparatı təhdidlərinin sürətlə artdığına diqqət çəkərək, bunun antidron müdafiə sistemlərinin sürətlə gücləndirilməsi və şəxsi heyətin qorunması baxımından kritik dövr olduğunu bildirib.

Sevinc Əliyeva
Ordu.az