Ordu.az xəbər verir ki, bu barədə şirkət məlumat yayıb.

Qeyd olunub ki, müqavilə Böyük Britaniya Müdafiə Nazirliyinin ilk dəfə yerli robotik platformanı sürətləndirilmiş prosedurla eksperimental hərbi proqramlara daxil etməsi baxımından mühüm addım hesab olunur.

Şirkətin açıqlamasına görə, RHINO kəşfiyyat, logistika dəstəyi və yaralıların təxliyəsi kimi müxtəlif missiyalar üçün istifadə oluna bilən modul tipli insansız quru platformasıdır.

Sistem geniş texniki yenidənqurma aparılmadan missiyalar arasında sürətli keçid etmək üçün hazırlanıb. “XRC Robotics” bildirib ki, RHINO platforması “qoş və işlət” prinsipi əsasında qurulmuş modul arxitekturaya malikdir.

Bu imkan sayəsində missiya avadanlıqları sahədə bir neçə dəqiqə ərzində dəyişdirilə bilir və texnikanın təmir bazasına qaytarılmasına ehtiyac qalmır. Mütəxəssislərin fikrincə, belə çeviklik müasir döyüş meydanında kiçik bölmə komandirlərinə ciddi əməliyyat üstünlüyü qazandıra bilər.

Bildirilir ki, bir platforma səhər saatlarında kəşfiyyat və müşahidə missiyası yerinə yetirdiyi halda, günün sonrakı hissəsində yaralıların təxliyəsi tapşırığına keçə bilər. Həmçinin fərqli missiyalar üçün ayrıca texnika parkı yaratmaq əvəzinə vahid platformada dəyişdirilə bilən modulların istifadəsi təlim, ehtiyat hissələri və texniki xidmət yükünü azaltmağa imkan verir.

“XRC Robotics” şirkətinin qurucusu Kem Nayton müqavilənin Britaniya müdafiə sənayesi üçün dönüş nöqtəsi olduğunu bildirib. Onun sözlərinə görə, şirkət Britaniya Ordusu ilə əməkdaşlıq edərək ölkənin dünya səviyyəli robot sistemləri üçün xarici ölkələrdən asılı olmadığını göstərmək istəyir.

Nayton əlavə edib ki, RHINO “Britaniya problemlərinə Britaniya həlli” prinsipi ilə hazırlanıb və müasir döyüş mühitində ölkəyə texnoloji üstünlük qazandırmağı hədəfləyir. Məlumata görə, Böyük Britaniyada son dövrlər müdafiə büdcəsi və strateji müstəqilliklə bağlı müzakirələrin artması fonunda yerli sistemlərin hazırlanmasına maraq yüksəlib.

Qeyd olunub ki, Müdafiə Nazirliyinin RHINO platformasını uzunmüddətli klassik satınalma prosedurları əvəzinə birbaşa eksperimental proqrama daxil etməsi müdafiə satınalma yanaşmasında dəyişiklik kimi qiymətləndirilir. Şirkət həmçinin bildirib ki, mühəndislər birbaşa Britaniya ordusunun sınaq sahələrində fəaliyyət göstərəcək və RHINO platforması hərbçilərin real ehtiyaclarına uyğun şəkildə daim təkmilləşdiriləcək.

Sevinc Əliyeva
Ordu.az