Ordu.az xəbər verir ki, bu barədə Türkiyənin milli müdafiə naziri Yaşar Gülər açıqlama verib.

Nazir bildirib ki, Böyük Britaniyadan alınması planlaşdırılan yeni istehsal “Eurofighter Typhoon” təyyarələrinin inventara daxil olmasına qədər yaranacaq ehtiyacın qarşılanması üçün Qətər və Omandan müəyyən sayda qırıcının silahlanmaya qəbul edilməsi nəzərdə tutulur.

O qeyd edib ki, bölgədə baş verən son hadisələr bu iki ölkə ilə aparılan proseslərə mənfi təsir göstərməyib.

Məlumata görə, Türkiyə Böyük Britaniyadan “Tranche 4” konfiqurasiyasında 20 ədəd yeni istehsal “Eurofighter Typhoon” qırıcısı almağı planlaşdırır. Təyyarələrin 2030-cu ildə 6, 2031-ci ildə 8, 2032-ci ildə isə daha 6 ədəd olmaqla təhvil verilməsi nəzərdə tutulur.

Qeyd olunub ki, tədarük paketinə “Meteor” uzaqmənzilli “hava-hava” raketləri də daxil ediləcək. Bundan əlavə, Türkiyə ilə Böyük Britaniya arasında 2026-cı il martın 25-də “Eurofighter Typhoon” qırıcılarının istismarı və texniki dəstəyi ilə bağlı müqavilə imzalanıb.

Müqaviləyə əsasən, “BAE Systems” şirkəti tərəfindən ehtiyat hissələri, dəstək avadanlıqları, pilot və mühəndis hazırlığı, yüksək reallıqlı simulyator sistemləri və radioelektron mübarizə imkanları təmin ediləcək.

Şirkətin həmçinin təyyarələrin xidmətə qəbulundan sonra ilk üç il ərzində texniki dəstək göstərəcəyi açıqlanıb.

Sevinc Əliyeva
Ordu.az