Ordu.az xəbər verir ki, bu barədə “The Washington Post” məlumat yayıb.
Qəzet anonimlik şərti ilə danışan hazırkı və keçmiş ABŞ rəsmilərinə istinadən çərşənbə axşamı bildirib ki, ABŞ təxminən 6 min hərbçini USS “George H.W. Bush” aviadaşıyıcısında və onu müşayiət edən gəmilərlə birlikdə regiona göndərir.
Məlumata görə, “Boxer” amfibiya döyüş qrupu və onun tərkibindəki 11-ci Dəniz Piyada Ekspedisiya Bölməsindən təxminən 4 200 digər hərbçinin də ayın sonuna yaxın bölgəyə çatması gözlənilir.
Daha əvvəl bildirilmişdi ki, fevralın 28-dən başlayan İran müharibəsində təxminən 50 min hərbçi iştirak edib.
Afrika ətrafından hərəkət etdiyi bildirilən USS “George H.W. Bush”un yaxınlaşması ilə regiondakı aviadaşıyıcıların sayı üçə çatacaq.
USS “Abraham Lincoln” və USS “Gerald Ford” artıq Yaxın Şərqdədir və İrana qarşı döyüş əməliyyatlarında iştirak ediblər.
“Al Jazeera”nın təsdiqləyə bilmədiyi bu məlumat ABŞ-nin çərşənbə günü İrana qarşı dəniz blokadasını davam etdirdiyi bir vaxtda yayılıb.
Dəniz blokadası
ABŞ Mərkəzi Komandanlığı (CENTCOM) sosial şəbəkələrdə bildirib ki, əvvəllər elan edilən blokada “tam şəkildə tətbiq olunub” və ABŞ qüvvələri “dəniz yolu ilə İrana daxil olan və çıxan iqtisadi ticarəti tam dayandırıb”.
Lakin çərşənbə axşamı dəniz izləmə məlumatlarına əsaslanan mənzərə o qədər də aydın olmayıb və İran limanlarından çıxan bir neçə gəminin blokadaya baxmayaraq Hörmüz boğazını keçdiyini göstərib.
Bu arada Prezident Donald Tramp çərşənbə axşamı “The New York Post”a bildirib ki, İranla yeni danışıqlar raundu “növbəti iki gün ərzində” Pakistanda keçirilə bilər, çünki ilk uzunmüddətli danışıqlar sessiyası nəticəsiz başa çatıb.
Ötən həftə ABŞ və İran Pakistanın paytaxtı İslamabadda keçirilən yüksək səviyyəli danışıqlardan sonra müharibəni dayandırmaq barədə razılığa gələ bilməsələr də, bir həftə əvvəl elan edilən iki həftəlik atəşkəs qüvvədə qalır. Atəşkəsin 2026-cı il aprelin 22-də başa çatacağı gözlənilir.
“The Washington Post”a danışan rəsmilərə görə, yeni hərbçilərin yerləşdirilməsi ABŞ administrasiyasına İranla danışıqları davam etdirməyə imkan verəcək, eyni zamanda “əlavə zərbələr və ya quru əməliyyatları ehtimalına” hazırlaşmağa şərait yaradacaq.
Sevinc Əliyeva
Ordu.az
