Ordu.az xəbər verir ki, sözügedən müqavilə Avropa müdafiə sənayesi baxımından strateji əhəmiyyətə malik “Type 212CD” sualtı qayıq proqramının genişləndirilməsi çərçivəsində həyata keçirilib.
Ümumilikdə 12 sualtı qayığa sistem təmin ediləcək
Yeni müqavilə ilə birlikdə “Indra” daha əvvəl altı sualtı qayığı əhatə edən mövcud proqramın davamı olaraq əlavə altı sualtı qayığa daha sistem təmin edəcək.
Beləliklə, şirkətin radioelektron mübarizə və radar həlləri ilə təchiz edəcəyi ümumi platforma sayı 12-yə çatacaq.
Qabaqcıl radioelektron mübarizə və radar qabiliyyətləri
Müqavilə çərçivəsində “Indra” tam rəqəmsal arxitekturaya malik radioelektron mübarizə sistemi ilə yanaşı qabaqcıl naviqasiya radarı təmin edəcək.
Bu sistemlərin sualtı qayıqların təhdidlərə qarşı qorunma qabiliyyətini artırması, ətraf mühit barədə məlumatlılığı genişləndirməsi və mürəkkəb əməliyyat mühitlərində effektiv fəaliyyət göstərməsinə dəstək verməsi hədəflənir.
Avropanın ən qabaqcıl dəniz proqramlarından biri
“Indra”nın Dəniz Sistemləri İş Biriminin rəhbəri Ana Belen Buendiya müqavilə ilə bağlı açıqlamasında bildirib: “Bu yeni müqavilə ilə “Indra” Avropanın ən qabaqcıl dəniz proqramlarından birində əsas texnologiya tərəfdaşı rolunu möhkəmləndirir. Bu proqram Almaniya, Norveç və ümumilikdə Avropa müdafiə sənayesi üçün strateji əhəmiyyət daşıyır”.
“Type 212CD” proqramının strateji rolu
“Type 212CD” sualtı qayığı havadan asılı olmayan hərəkət (AIP) sistemi ilə təchiz edilmiş yeni nəsil ənənəvi sualtı platforma kimi önə çıxır.
Ortaq dizayn əsasında hazırlanan bu platformanın xüsusilə Şimali Atlantikdə dəniz təhlükəsizliyinin təmin olunması və NATO ilə uyğun fəaliyyət qabiliyyətinin artırılması baxımından mühüm rol oynayacağı gözlənilir.
Avropa müdafiə sənayesində texnoloji müstəqillik vurğusu
“Indra” qeyd edib ki, bu proqram yalnız platforma təchizatı prosesi deyil, eyni zamanda Avropanın müdafiə sahəsində texnoloji müstəqilliyini gücləndirən addımdır.
Şirkət yeni nəsil dəniz platformaları üçün qabaqcıl texnologiyalar hazırlamaq öhdəliyini davam etdirdiyini və bu kimi layihələrin Avropa müdafiə ekosisteminin dərinləşməsinə töhfə verdiyini bildirib.
Sevinc Əliyeva
Ordu.az
