Ordu.az xəbər verir ki, bu tədarük donanma daxilində kiçik sinif taktiki pilotsuz uçuş aparatları proqramı çərçivəsində reallaşdırılıb.

Razılaşma çərçivəsində ABŞ Dəniz Piyadaları ilk dəfə “Stalker” pilotsuz uçuş aparatının qabaqcıl naviqasiya sisteminə malik yeni konfiqurasiyasını inventarına daxil edəcək. Bu versiya xüsusilə GPS siqnallarının pozulduğu və ya əlçatmaz olduğu şəraitdə fəaliyyət göstərmək qabiliyyəti ilə seçilir.

Şirkət rəsmiləri bildiriblər ki, qabaqcıl naviqasiya geniş ərazilərdə və siqnalın kəsildiyi mühitlərdə uzunmənzilli kəşfiyyat əməliyyatları üçün kritik əhəmiyyət daşıyır.

Tədarük paketinə pilotsuz uçuş aparatları ilə yanaşı, elektro-optik sensorlar, müxtəlif məsafələr üçün uyğun yerüstü idarəetmə stansiyaları və dəstək avadanlıqları da daxildir.

Hazırda ABŞ Dəniz Piyadalarının envanterində 250-dən çox “Stalker” pilotsuz uçuş aparatı mövcuddur və yeni sifarişlə qabaqcıl naviqasiya sisteminə keçidin mərhələli şəkildə həyata keçirilməsi planlaşdırılır.

Sevinc Əliyeva
Ordu.az