Ordu.az xəbər verir ki, bu barədə “Times of Israel” nəşri məlumat yayıb.
Danışıqlar ABŞ Dövlət Departamentində qapalı formatda keçirilib. Görüş ABŞ dövlət katibi Marko Rubio, Dövlət Departamentinin müşaviri Maykl Nidhem, Livanda ABŞ səfiri Mişel İsa və BMT-də ABŞ səfiri Mayk Uolts tərəfindən təşkil olunub.
Tərəflərin yaydığı birgə bəyanatda qeyd olunub ki, bu görüş birbaşa sülh danışıqlarının başlanğıcı deyil, belə danışıqlara hazırlıq mərhələsidir.
“ABŞ hər iki ölkəni bu tarixi mərhələ münasibətilə təbrik edib və gələcək danışıqlara dəstəyini ifadə edib. Eyni zamanda Livan hökumətinin ölkədə güc üzərində nəzarəti bərpa etmək və İranın həddindən artıq təsirini aradan qaldırmaq planlarına dəstək verib”, - deyə bəyanatda bildirilib.
Vaşinqton ümid etdiyini bildirib ki, danışıqlar 2024-cü il razılaşmasından kənara çıxaraq hərtərəfli sülh sazişinə gətirib çıxara bilər. Bu, ABŞ-nin vasitəçiliyi ilə Livanda əldə olunmuş əvvəlki atəşkəsə istinad edir.
Həmin atəşkəs “Hizbullah”ın silahsızlaşdırılmasını və qüvvələrinin Livanın cənubundan çıxarılmasını nəzərdə tuturdu, lakin bu hədəflər əsasən yerinə yetirilməyib.
ABŞ öz bəyanatında İsrailin “Hizbullah”ın davam edən hücumlarından müdafiə olunmaq hüququnu dəstəklədiyini də qeyd edib və vurğulayıb ki, Livanda hər hansı atəşkəs yalnız Yerusəlim və Beyrut arasında danışıqlar yolu ilə əldə olunmalıdır.
Nəşr xatırladır ki, İran Livanın ABŞ ilə əldə edilən atəşkəs razılaşmasına daxil edilməsinə çalışıb. Lakin pakistanlı vasitəçilərin bu razılaşmaya “Hizbullah”ın da daxil edilməli olduğu barədə bəyanatlarına baxmayaraq, Yerusəlim və Vaşinqton bu şərtləri rədd edib.
Nəticədə İsrail və “Hizbullah” arasında döyüşlər İranda atəşkəs qüvvəyə mindikdən sonra daha bir həftə davam edib.
Birgə bəyanatda Livanın mövqeyi də əks olunub və 2024-cü ilin noyabrında əldə olunmuş atəşkəs razılaşmasının bərpasının “təcili zərurət” olduğu vurğulanıb.
Bəyanatda qeyd olunur ki, Beyrut ərazi bütövlüyü və dövlət suverenliyi prinsiplərini önə çəkir, eyni zamanda ölkənin üzləşdiyi ağır humanitar böhranın aradan qaldırılması üçün konkret addımların atılmasına çağırır.
İsrail isə bəyanatda bütün qeyri-dövlət silahlı qrupların silahsızlaşdırılmasını və Livanda bütün terror infrastrukturunun ləğvini dəstəklədiyini bildirib. Həmçinin Livan hökuməti ilə əməkdaşlıq etməyə hazır olduğunu vurğulayıb.
“İsrail bütün həll olunmamış məsələlərin aradan qaldırılması və uzunmüddətli sülhə nail olmaq üçün birbaşa danışıqlarda iştirak etməyə hazırdır”, - deyə bəyanatda qeyd olunub.
Birgə bəyanatda əlavə olunub ki, tərəflər qarşılıqlı razılaşdırılmış vaxt və məkanda birbaşa danışıqlara başlamaq barədə razılığa gəliblər, lakin növbəti görüşün konkret tarixi açıqlanmayıb.
Sevinc Əliyeva
Ordu.az
