Nazirliyin “X” platformasında yayılan açıqlamasında deyilir: “Daxili İşlər Nazirliyi bildirir ki, bu axşam xarici jurnalist naməlum şəxslər tərəfindən qaçırılıb”.
Jurnalistin Kittleson olduğu “Al Hadath” Səudiyyə Ərəbistanına məxsus media qurumunun xəbərində qeyd olunub.
Məlumatda deyilir: “Silahlı şəxslər amerikalı jurnalist Şelli Kittlesonu Bağdadın mərkəzindən qaçırıb”. CNN jurnalisti Aleks Plitsas da xəbəri təsdiqləyib.
O, “X” platformasında yazıb: “Dostum Şelli Kittlesonun Bağdadda “Kətaib Hizbullah”tərəfindən qaçırıldığını təsdiqləyə bilərəm. Harada olduğu və vəziyyəti məlum deyil. Mən onun ABŞ üzrə əlaqələndirici şəxsiyəm. Məlumatınız varsa hüquq-mühafizə orqanlarına bildirin və mənə şəxsi mesaj göndərin”.
İraqın “Akeed Press” nəşri silahlı şəxslərin Kittlesonu Bağdadın mərkəzində Sədun küçəsində yerləşən “Palestine Hotel” yaxınlığından apardığını bildirib. “Turkiye Today” nəşrinə görə, qaçırmanı “Kataib Hezbollah” həyata keçirib. Bu qrup İran tərəfindən dəstəklənir və ABŞ tərəfindən xarici terror təşkilatı kimi tanınıb. Qaçırılma ABŞ və İsrailin İraqda müharibə apardığı bir vaxtda baş verib və bu, Yaxın Şərqdə gərginliyi artırıb.
Məlumatlara görə, atışma zamanı qaçıranların avtomobili aşıb, Kittleson hadisə yerində azad edilib və müalicə üçün xəstəxanaya aparılıb. Həmçinin qaçıranlardan birinin saxlanıldığı bildirilib. Lakin onun azad edilməsi ilə bağlı rəsmi təsdiq yoxdur. Nazirlik Kittlesonun axtarışlarının davam etdiyini açıqlayıb.
Kittlesonun qaçırılması anını əks etdirdiyi iddia edilən video da sosial mediada yayılıb.
Şelli Kittleson haqqında bilinməli 5 fakt
Kittleson sosial media bioqrafiyasına görə Yaxın Şərq və Əfqanıstandan reportajlar hazırlayan mükafatlı jurnalistdir.
O, “Al-Monitor”, “Foreign Policy”, “Politico”, “BBC World Service” kimi media qurumları ilə əməkdaşlıq edib.
Məlumatlara görə, Kittleson 2017-ci ildə müharibə zonalarından reportajlarına görə İtaliyanın “Premio Caravella” mükafatını alıb və Bağdadda fəaliyyət göstərib.
Onun “LinkedIn” profilinə görə, Kittleson təhlükəli mühitlərdə fəaliyyət üzrə HEFAT sertifikatına və “Istituto di Lingua e Cultura Russa”dan rus dili diplomuna malikdir.
Kittlesonun reportajları İraqda İŞİD və İran tərəfdarı silahlı qruplara qarşı cəbhə xəttindən reportajları da əhatə edir.
Sevinc Əliyeva
Ordu.az
