Ordu.az “Yonhap” agentliyinə istiandən xəbər verir ki, Cənubi Koreyanın müdafiə naziri An Gyu-bek ölkəyə səfər edən yaponiyalı həmkarı Koizumi Şinçiro ilə Seul şəhərində görüş keçirib.

Cənubi Koreya Müdafiə Nazirliyinin açıqlamasında bildirilib ki, tərəflər iki ölkə arasında müdafiə sahəsində əməkdaşlığın inkişaf etdirilməsi istiqamətində səylərin davam etdirilməsi barədə ortaq mövqe nümayiş etdiriblər.

Görüş zamanı xüsusilə süni zəka başda olmaqla qabaqcıl elm və texnologiya sahələrində əməkdaşlığın genişləndirilməsi barədə qərar qəbul olunub.

Nazirlər Koreya yarımadasının tamamilə nüvə silahlarından azad edilməsi və bölgədə davamlı sülhün təmin olunmasına sadiqliklərini bir daha təsdiqləyiblər.

Bununla yanaşı, regional sülh və sabitliyin qorunması məqsədilə ikitərəfli koordinasiyanın, eləcə də Cənubi Koreya, ABŞ və Yaponiya arasında üçtərəfli əməkdaşlığın davam etdirilməsi barədə də razılıq əldə olunub.

Sevinc Əliyeva
Ordu.az