Ordu.az xəbər verir ki, bu barədə CNN Ağ Evin mətbuat katibi Karolayn Levitə istinadən məlumat yayıb.
Levit bildirib ki, neft tankerlərinin, o cümlədən ötən həftə Trampın bəhs etdiyi 10 və daha 20 tankerin boğazdan keçidi yaxın günlərdə baş tutmalıdır və bu, ABŞ ilə İran arasında davam edən birbaşa və dolayı danışıqların nəticəsidir.
Onun sözlərinə görə, ABŞ qoşunları Yaxın Şərqə Prezident Donald Trampa İranla müharibədə “maksimum fəaliyyət azadlığı” vermək üçün göndərilir, lakin rəsmilər hələ də diplomatik həll yolu axtarırlar.
Ağ Ev həmçinin bəyan edib ki, ABŞ ilə danışıqlar aparan iranlı rəsmilər “əvvəlki rejimin rəhbərlərindən daha məntiqli görünürlər”, lakin onların adları açıqlanmayıb.
Karolayn Levit vurğulayıb ki, İranın verəcəyi istənilən vəd onun məsuliyyətə cəlb olunması üçün “yoxlanılacaq”. O xəbərdarlıq edib ki, əgər qarşı tərəfin Trampın şərtləri əsasında diplomatik razılaşmaya hazır olmadığı məlum olsa, hərbçilər bu imkanları məhv etməyə çalışacaqlar.
“İranın bütün ictimai bəyanatlarına və saxta mesajlarına baxmayaraq, danışıqlar davam edir və yaxşı gedir. Əlbəttə, açıq şəkildə deyilənlər bizimlə özəl söhbətlərdə dediklərindən çox fərqlənir”, - deyə Levit bildirib.
O əlavə edib ki, əgər İran ABŞ ilə razılaşmadan imtina etsə, Donald Trampın “İranın bu və ya digər şəkildə ağır bədəl ödəməyə davam etməsini təmin etmək” üçün variantları var.
“Yaxın Şərqdə yerləşdirilən qüvvələrə gəlincə, Pentaqonun vəzifəsi ali baş komandan üçün maksimum fəaliyyət azadlığı yaratmaqdır. Bu o demək deyil ki, prezident əlavə qərar qəbul edib”, - deyə Ağ Evin sözçüsü bildirib.
Levit həmçinin qeyd edib ki, diplomatiya Trampın “bir nömrəli seçimidir”.
İranla müharibənin nə qədər davam edəcəyi barədə sualı cavablandıran Levit “Sky News”a bildirib ki, Donald Trampın müharibənin əvvəlində açıqladığı dörd-altı həftəlik vaxt cədvəli qüvvədə qalır.
“Özünüz hesablayın”, - deyə o vurğulayıb.
Bu halda müharibənin altıncı həftəsi aprelin 11-də başa çatır.
Levit əlavə edib ki, bu günədək düşmən hədəflərinə 11 mindən çox zərbə endirilib və müharibə başlayandan bəri İranın raket və pilotsuz uçuş aparatları ilə hücumlarının sayı təxminən 90 faiz azalıb.
“Silahlı qüvvələrimiz İranın müdafiə sənaye bazasını məhv etməyə davam edir. Onun raket, pilotsuz uçuş aparatı, hərbi dəniz avadanlığı və gəmiqayırma istehsal obyektlərinin təxminən 70 faizi zədələnib və ya məhv edilib”, - deyə o vurğulayıb.
Sevinc Əliyeva
Ordu.az
