Ordu.az xəbər verir ki, bunu BMT-nin enerji üzrə erməni eksperti Ara Mərcanyan deyib.

Onun sözlərinə görə, söhbət Prezident Trampın ikinci müddəti ilə əlaqələndirilən yeni dünya nizamının formalaşdırılması proseslərindən, onun verdiyi və nəticələri olan qərarlardan gedir.

“Dünyanın strukturu dəyişir, bir vaxtlar dünyaların formalaşması adlandırdığımız şey, yəni böyük makroregionların formalaşması prosesi baş verir.

Bəlkə də bunun ən bariz təzahürü ABŞ-nin bütün Qərb yarımkürəsini özünün makroregionu hesab etdiyi “Monro Doktrinası” adlanan doktrinanın dirçəlişidir. Bu, Kanada, Meksika və Mərkəzi Latın regionunda konsolidasiya deməkdir. Bu, Qrenlandiya ilə bağlı inkişaflarla müşayiət olunur.

Şərq yarımkürəsində makroregionların formalaşmasını da müşahidə edirik. Türk Dövlətləri Təşkilatının aktivləşməsini, bir neçə regional blokun formalaşmasını müşahidə edirik. Pakistan-Türkiyə-Azərbaycan üçtərəfli strateji əməkdaşlıq bloku Ermənistan üçün xüsusilə vacibdir və narahatvericidir”, - deyə Mərcanyan qeyd edib.

O bildirib ki, İsrail-Yunanıstan-Kipr blokunun yaranması da maraqlıdır.

“Rusiya öz makroregionunu qorumağa çalışır. Ukraynada isə hadisələrin necə inkişaf etdiyini görürsünüz. Çin də eyni şeyi edir. Cənubi Çin dənizində çox vacib proseslər gedir. Orada da makroregionlar formalaşır. Bir sözlə, dünya yenidən formalaşma prosesindədir. Bu vəziyyətdə Ermənistan dəqiq və hesablanmış addımlar atmağa məcburdur. Hər bir səhv ağır nəticələrlə doludur və əksinə, düzgün qərarlar ciddi perspektivlər aça bilər.

Neokolonializm, bəlkə də, son dövrlərin ən vacib trendidir. Biz bunu planetin müxtəlif yerlərində görürük. TRIPP (Zəngəzur dəhlizi-red.) proqramının müəyyən bir neokolonial tonu var. Bəs alternativ nə idi? Heç getməmək və həmin proqramdan kənarda qalmaq? Axı TRIPP Ermənistanı geosiyasi proseslərə cəlb etdi. TRIPP Ermənistanı regional blokadadan çıxma proseslərinin bir hissəsinə çevirir”, - deyə erməni ekspert bildirib.

Mərcanyanın qiymətləndirməsinə görə, bugünkü siyasi narrativlər göstərir ki, TRIPP Rusiya, Çin və İran əleyhinə güclü bir gündəmdir.

“Bütün bu iddialar doğrudur: Anakondanın böyük strategiyası görünür, lakin onun əks-oyunları görünmür. “Böyük Yalta Bazarı” baş tutacaq və həmin vaxt ABŞ ilə Rusiyanın güzəştə getməsi istisna deyil. Həmçinin müəyyən bir məqamda Rusiya və ABŞ-nin Rusiyanın TRIPP-də iştirakı ilə bağlı razılığa gələcəyi də istisna deyil. Bir sözlə, TRIPP-ə böyük güc blokları arasında qarşıdurma deyil, əməkdaşlıq sahəsi kimi baxılmalıdır”, - deyə o qeyd edib.

Mərcanyan deyib ki, Ermənistan böyük bir strategiya təklif etmək iqtidarında deyil.

“Ermənistan Çin, ABŞ, Rusiya deyil. Zəngəzur ABŞ-nin Transxəzər maraqlarının tacıdır, çünki Qazaxıstan neftini və Türkmənistan qazını Avropaya çatdıran ən qısa və ən səmərəli marşrut Zəngəzurdən keçir və bu, bütün bunların ən ləzzətli hissəsidir. Və bu vəziyyəti nəzərdən qaçırmaq olmaz. Ermənistan açıq şəkildə bildirməlidir ki, əgər söhbət Transxəzər layihələrinin həyata keçirilməsindən gedirsə, onda biz yalnız həmin 46 km-lik hissə üçün tranzit ölkə deyilik, həm də müəyyən pay və proqramlarla həmin layihədə iştirak etmək istəyirik. Yaxud deməliyik ki, əziz tərəfdaşlar, Ermənistanı Xəzəryanı ölkələr dairəsinə daxil edin və Açıq Dənizlər haqqında beynəlxalq Konvensiyanın müddəalarına əməl etmək üçün kifayət qədər xeyirxah olun”, - deyə o bildirib.

Alpər Mövludoğlu
Ordu.az