Ordu.az “Bloomberg”ə istinadən xəbər verir ki, Ərdoğan Fransanın sistemin Türkiyə ilə birgə istehsalına qarşı çıxmasını aradan qaldırmağı tələb edəcək. Ankara bu sistemin tədarükünü sürətləndirərək, milli hava hücumundan müdafiə layihəsi olan “Çelik Kubbe”ni 2-3 il ərzində fəaliyyətə keçirməyi hədəfləyir.

Ərdoğanın zirvədə NATO daxilində ikinci ən böyük orduya sahib olan Türkiyənin Avropa təhlükəsizliyi baxımından kritik rol oynadığını vurğulaması gözlənilir. Ərdoğanın həmçinin müdafiə sənayesi əməkdaşlığının qarşısındakı siyasi maneələrin aradan qaldırılmasının vacibliyini qeyd edəcəyi bildirilir.

Fransa keçmişdə Türkiyənin Suriya siyasəti və Şərqi Aralıq dənizində Yunanıstan-Kipr gərginliyi səbəbilə SAMP/T sisteminə məsafəli yanaşmışdı. Lakin sistemin digər ortağı olan İtaliyanın Türkiyəyə satışa isti baxdığı bilinir.

SAMP/T sisteminin Türkiyədə birgə istehsalı Ankaranın müdafiə sənayesi imkanlarını inkişaf etdirməyi və xarici asılılığı azaltmağı hədəfləyir. Görüşün Fransa ilə müdafiə əməkdaşlığında yeni bir dövrün qapısını açıb-açmayacağı maraqla gözlənilir.

Sevinc Əliyeva
Ordu.az