Ordu.az xəbər verir ki, Namibiya Silahlı Qüvvələri tərəfindən təşkil olunan hərbi parad zamanı ordunun inventarında yer alan və “Shaanxi SX2190” yolsuzluq yük maşını şassisində yerləşdirilmiş FB-6A qısa mənzilli hava hücumundan müdafiə sistemi ictimaiyyətə təqdim olunub.

Hərbi mütəxəssislərə görə, Çin istehsalı olan FB-6A ABŞ Ordusunun “AN/TWQ-1 Avenger” SHORAD sistemindən ilham alınaraq hazırlanıb.

Sistem hədəf aşkarlanması və izlənməsi üçün nəzərdə tutulmuş bir radar maşını və qısa mənzilli “yer-hava” raketləri ilə təchiz olunmuş buraxıcı vasitədən ibarətdir. Standart konfiqurasiyada tam bir FB-6A batareyasında bir komanda mərkəzi və səkkizə qədər raket buraxılış qurğusu olur.

Məlumatlara əsasən, sistem 500-6.000 metr məsafədəki alçaqdan uçan təyyarə və pilotsuz uçuş aparatlarını maksimum 4.500 metr yüksəklikdə vurmaq üçün nəzərdə tutulub.

Çinin Afrika müdafiə təchizatçısı kimi rolu, xüsusilə Qərb sistemlərinə nisbətən daha sərfəli alternativlərə tələbin artdığı havadan müdafiə sektorunda genişlənməyə davam edir.

Sevinc Əliyeva
Ordu.az