Ukrayna prezidenti və hücuma cavabdeh olan kəşfiyyat qurumu SBU dərhal əməliyyata görə məsuliyyəti öz üzərinə götürdü. Onlar əməliyyatın hazırlıq və icra mərhələlərinin təfərrüatlarını ictimaiyyətlə bölüşdülər. Bu, kəşfiyyat və xüsusi əməliyyatlar sahəsində qeyri-adi davranış sayılır.
Pilotsuz Uçuş Aparatı (PUA) hücumlarının əvvəlcədən hazırlanmış qrafikləri, təsvirləri və zamanlaması ilə birgə verilən açıqlamalar göstərdi ki, bu kommunikasiya kortəbii deyil, fərqli auditoriyalara psixoloji təsir göstərmək və Rusiyaya əlavə zərbə vurmaq məqsədi daşıyır.
Əməliyyatın mərhələləri:
1. Planlaşdırma və Hazırlıq: Əməliyyat üçün lazım olan insan resursları və texnika müxtəlif yollarla Rusiya ərazisinə gətirildi və hədəf əraziyə yerləşdirildi. Hədəflərin kəşfiyyatı və təhlükəsizlik təhlili aparıldı. Agentlərin oğurlanması bu mərhələdə baş verdi.
2. Tətbiq: PUA-ları daşıyan konteynerlər əvvəlcədən seçilmiş ərazilərə çatdırıldı. Bunun üçün rus yükdaşımaları istifadə edildi. Beləcə dağıdıcı hücum üçün infrastruktur quruldu.
3. Kommunikasiya: Əvvəlcədən qərarlaşdırılmışdı ki, əməliyyat uğurlu olarsa, proaktiv kommunikasiya qurulacaq. Məqsəd yalnız uğuru elan etmək deyil, həm də strateji psixoloji təsir yaratmaq idi.
Daxili və Xarici Əlaqənin Strateji İstifadəsi
Göteyə aid edilən “Yaxşılıq et və bu haqda hamıya danış” ifadəsi kəşfiyyat üçün uyğun deyil. Lakin Ukrayna bu yanaşmanı alt-üst edərək Qazaxıstan üzərindən sızma marşrutu, konteynerlərin üzərindəki qoşa damlar, PUA-ların sayı və hətta əməliyyat qərargahının FTX binasının yaxınlığında qurulması faktını açıq şəkildə paylaşdı.
Xüsusilə FTX-nin burnu altında fəaliyyət göstərilməsi mesajı Rusiyanın təhlükəsizlik sisteminə birbaşa çağırışdır və ölkə daxilində güvən böhranı yaratmaq üçün nəzərdə tutulub.
Qorxu Mühiti və Psixoloji Təsir
Əməliyyatdan sonra internetdə yayılan videolarda Rusiyanın müxtəlif keçid məntəqələrində yük maşınlarının uzun növbələrinin yarandığı müşahidə edildi. “Hər yük maşını yeni bir hücum vasitəsi ola bilər” düşüncəsi bu qorxu atmosferini daha da gücləndirdi.
Bu, yaxın zamanda sərt nəzarətlərin tətbiq olunmasına, nəticədə isə Rusiyanın logistik zəncirinə iqtisadi təzyiqlərə səbəb ola bilər. Beləcə, Ukraynanın aktiv ünsiyyəti təkcə psixoloji deyil, həm də iqtisadi təsir yaratdı.
Müttəfiqlərə Mesaj: Ukrayna Hələ də Güclüdür
Keçən il Kursk bölgəsinə edilən gözlənilməz hücumdan sonra Ukrayna bu dəfə daha genişmiqyaslı və mürəkkəb əməliyyatla Rusiyanın strateji imkanlarına zərbə vurdu. Bu da müttəfiqlərinə Ukraynanın hələ də lider və dəstəyə layiq olduğunu göstərdi.
Strateji bombardmançıların, xüsusilə də nüvə triadasının bir hissəsi olan təyyarələrin sıradan çıxarılması NATO ölkələri üçün də strateji rahatlıq mənasına gəlir. Rusiyanın hava hücum imkanları əhəmiyyətli dərəcədə zəifləyib.
Döyüş sahəsində uğurların az rastlandığı bir dövrdə bu əməliyyat Ukrayna xalqı üçün böyük mənəvi dayaq oldu və gələcəkdə bu cür aksiyaların davam edəcəyinə ümid verdi.
Dəyanət Ağalarlı
Ordu.az
