Ordu.az xəbər verir ki, Donald Tramp bu barədə “Truth Social” sosial şəbəkəsində paylaşım edib.

ABŞ Prezidenti bildirib ki, onun prezidentliyi dövründə paytaxtda yerləşən onlarla memorial, abidə, heykəl və fəvvarə təmizlənib, bərpa olunub və abadlaşdırılıb. O qeyd edib ki, şəhərdə cinayətkarlığın səviyyəsini də əhəmiyyətli dərəcədə azaltmaq mümkün olub.

Tramp xüsusi olaraq yaxın zamanda yenidən qurulmuş Güzgülü Hövzənin vəziyyətinə diqqət çəkib. Onun sözlərinə görə, naməlum şəxslər hövzə ətrafındakı ot örtüyünə ziyan vurub və kimyəvi maddələrdən istifadə etməklə obyektin daxili örtüyünü sıradan çıxarmağa cəhd göstəriblər.

“Cəmi üç gün əvvəl onlar hövzənin yaxınlığındakı ot örtüyünü məhv ediblər və yeni quraşdırılmış daxili səthə zərər vurmaq üçün əllərindən gələni ediblər. Daha əvvəl Milli Bulvarda olduğu kimi, burada da gözəl işimizi korlamaq üçün kimyəvi maddələrdən istifadə olunub. Hazırda yosunların 75 faizi məhv edilib. Vəziyyət tezliklə düzəldiləcək və zədələnmiş kiçik hissə gələn həftənin əvvəlində bərpa olunacaq”, - deyə Tramp yazıb.

ABŞ Prezidenti siyasi rəqiblərini də tənqid edərək insidentdə solçu siyasi qüvvələrin nümayəndələrinin əlinin ola biləcəyini iddia edib.

O, həmçinin jurnalist Conatan Karlın adını çəkərək bildirib ki, onun hövzənin yaxınlığında obyektin rezin örtüyünə zərər verməyə çalışdığı müşahidə olunub.

Trampın sözlərinə görə, hüquq-mühafizə orqanları artıq hadisə ilə bağlı araşdırmalara başlayıb və yaxın vaxtlarda insidentin bütün təfərrüatlarının müəyyənləşdirilməsi gözlənilir.

Sevinc Əliyeva
Ordu.az