Ordu.az xəbər verir ki, bu barədə “Defense Post” nəşri məlumat yayıb.

“Mortars App” adlanan proqram təminatı minaatan atəşinin birbaşa smartfon vasitəsilə koordinasiya edilməsinə imkan verir.

Məlumata görə, tətbiq müasir və etibarlı proqram arxitekturası əsasında hazırlanıb və döyüş şəraitində istifadəyə uyğun intuitiv interfeysə malikdir.

Tətbiq “Windows” və “Android” daxil olmaqla müxtəlif əməliyyat sistemləri ilə uyğun işləyir ki, bu da onun geniş cihaz çeşidində istifadəsinə imkan yaradır.

Yeni proqram əvvəlki “Mortar Fire Control Software” sistemindən fərqli olaraq xüsusi qorunan noutbuklara ehtiyac duymur. Tətbiq adi telefon və planşetlərdə problemsiz işləyərək bütün zəruri funksiyaları vahid inteqrasiya olunmuş paketdə birləşdirir.

Gözlənilir ki, proqramın növbəti yeniləmələri ənənəvi sistemlərlə müqayisədə xeyli az hesablama resursu tələb edəcək. Bu isə yeni rəqəmsal imkanların birbaşa ön xəttdəki hərbi qulluqçulara daha sürətli çatdırılmasına şərait yarada bilər.

Layihəyə rəhbərlik edən kompüter mühəndisi Culiya Qustafson bildirib ki, komandası artıq tətbiqin daha müasir versiyalarının hazırlanması üzərində işləyir.

Onun sözlərinə görə, yaxın gələcəkdə daha qabaqcıl proqram həllərinin tətbiqi planlaşdırılır.

Sevinc Əliyeva
Ordu.az