Ordu.az xəbər verir ki, alışın məqsədi Rumıniyanın fövqəladə hallara cavabvermə, böhranların idarə olunması, mülki müdafiə və humanitar yardım imkanlarını gücləndirməkdir.
Fövqəladə hallar və humanitar missiyalarda istifadə olunacaq
Yeni təyyarələr Rumıniya Daxili İşlər Nazirliyinin Aviasiya Baş Müfəttişliyi tərəfindən istismar ediləcək. Qurum Fövqəladə Hallar Departamentinin koordinasiyası altında fəaliyyət göstərir.
Məlumata görə, C-27J “Spartan” təyyarələri həm Rumıniyada, həm də Avropa miqyasında fəlakətlərin idarə olunması, mülki müdafiə və fövqəladə hallara müdaxilə əməliyyatlarında istifadə ediləcək.
Təyyarələrin təbii fəlakətlər və digər kritik vəziyyətlər zamanı zərərçəkmiş əhaliyə dəstək göstərməsi də planlaşdırılır.
Çoxməqsədli istifadə imkanları təqdim edir
“Leonardo” şirkətinin açıqlamasına görə, C-27J sürətlə quraşdırılıb çıxarıla bilən missiya modulları sayəsində müxtəlif əməliyyatlara uyğunlaşdırıla bilir.
Təyyarələr şəxsi heyətin və yüklərin daşınması ilə yanaşı, ağır vəziyyətdə olan, yaralı və ya yoluxucu xəstəlik daşıyan şəxslərin təhlükəsiz təxliyəsi, dəqiq yanğınsöndürmə əməliyyatları, quru və dəniz üzərində uzaqmənzilli axtarış-xilasetmə missiyaları və humanitar yardım tapşırıqlarında da istifadə oluna bilər.
Rumıniyanın “Spartan” parkı 9 təyyarəyə çatacaq
Yeni sifarişdən sonra Rumıniyanın C-27J “Spartan” parkındakı təyyarələrin sayı 9-a yüksələcək. Bundan əlavə, sifariş C-27J proqramı çərçivəsində dünya üzrə verilmiş ümumi təyyarə sayını 102-yə çatdıracaq.
Platformanın istifadəçilərinin sayı isə 19 ölkədə fəaliyyət göstərən 22 operatora yüksələcək. Müqaviləyə missiya modulları, logistika dəstəyi, təlim və infrastruktur xidmətləri də daxildir. İlk təyyarənin 2029-cu ildə təhvil verilməsi planlaşdırılır.
Rumıniya yeni nəsil versiyanı əldə edən ilk istifadəçilərdən olacaq
Rumıniyanın sifariş etdiyi iki təyyarə ölkəyə çatdırılacaq ilk “Next Generation” konfiqurasiyalı C-27J-lər olacaq. Yeni nəsil versiyada mövcud C-27J parkı ilə tam uyğunluq saxlanılır.
Eyni zamanda təkmilləşdirilmiş avionik, yeni rabitə sistemləri və aerodinamik yeniliklər tətbiq edilib. “Leonardo” şirkəti bildirir ki, bu təkmilləşdirmələr əməliyyat səmərəliliyini və missiya imkanlarını artıracaq.
Sevinc Əliyeva
Ordu.az
