Ordu.az xəbər verir ki, bu razılaşma iki ölkə arasındakı müdafiə əlaqələrini dərinləşdirir və hər iki şirkətin bir-birini tamamlayan texnoloji və əməliyyat imkanlarını vahid çərçivədə birləşdirir.
İmzalanan anlaşma memorandumu dəniz müdafiə sistemlərinin araşdırılması, birgə inkişaf prosesləri və bu sistemlərin kommersiyalaşdırılması mərhələlərini əhatə edən strateji əməkdaşlıq çərçivəsi yaratmağı hədəfləyir. Tərəflər mövcud və gələcək dəniz təhdidlərinə qarşı bir-birini tamamlayan sənaye və texnoloji imkanlarını birləşdirməyi planlaşdırır.
TKMS-in baş icraçı direktoru Oliver Burkhard razılaşmanın təkcə sənaye tərəfdaşlığından daha böyük məna daşıdığını vurğulayıb. O bildirib ki, öz güclərini birləşdirərək texnoloji imkanlarını inkişaf etdirirlər və eyni zamanda Almaniya ilə İsrail arasındakı strateji əlaqələri möhkəmləndirirlər.
Onun sözlərinə görə, bugünkü mürəkkəb təhlükəsizlik mühitində sabitlik və dayanıqlığı təmin etmək üçün oxşar baxışlara malik tərəfdaşlar arasında yaxın əməkdaşlıq zəruridir. “Elbit Systems”in prezidenti və baş icraçı direktoru Bezhalel Maçlis isə əməkdaşlığın dəniz qüvvələrinin dəyişən tələblərinə cavab vermək qabiliyyətini artıracağını qeyd edib.
O bildirib ki, hər iki şirkətin texnoloji güclərini və əməliyyat təcrübəsini birləşdirərək dəniz qüvvələrinin dəyişən ehtiyaclarını ödəyən qabaqcıl həllər təqdim etməyi və regional və qlobal təhlükəsizliyi dəstəkləmək üçün Almaniya ilə İsrail arasındakı strateji tərəfdaşlığı daha da gücləndirməyi hədəfləyirlər.
Köklü əməkdaşlığın yeni halqası
Bu razılaşma iki şirkət arasında əvvəlcədən mövcud olan münasibətlərin üzərində qurulur. TKMS daha əvvəl İsrail Hava və Kosmik Sənayesi ilə birlikdə həm İsrail Hərbi Dəniz Qüvvələrinə, həm də Alman Hərbi Dəniz Qüvvələrinə insansız sualtı platformaların tədarükü üçün iş aparıb.
TKMS eyni zamanda milyardlarla şekel dəyərində dörd yeni sualtı qayığı İsrail Hərbi Dəniz Qüvvələrinə satan şirkət kimi də tanınır. “Elbit Systems” isə 2004-cü ildə Almaniyanın “Telefunken” şirkətinin rabitə sistemləri bölməsini aldıqdan sonra Almaniya bazarında fəaliyyətini davam etdirir.
Şirkət elektron müharibə sistemləri, “Sigal” pilotsuz uçuş aparatı və sonar sistemlərini Almaniyada satışa çıxarmaqla yanaşı, İsraildən TKMS üçün sualtı qayıq konstruksiya hissələri də istehsal edir.
Bu razılaşma iki ölkə arasındakı geniş müdafiə əməkdaşlığının əksidir. Almaniya hazırda bir sıra İsrail müdafiə şirkətlərinin əsas tədarükçüsü mövqeyindədir. IAI-nin “Arrow-3” raketdən müdafiə sistemi və “Heron TP” pilotsuz uçuş aparatları Alman Hərbi Hava Qüvvələrinə, “Rafael”in “Spike” tankəleyhinə raketləri isə Alman Quru Qoşunlarına xidmət edir.
185 illik sənaye tarixinə malik TKMS Kiel, Vismar və Braziliyanın Itajaí şəhərindəki gəmiqayırma zavodlarında 9 min 100-dən çox əməkdaşı ilə dünyanın aparıcı dənizçilik sistemi təchizatçıları sırasındadır.
“Elbit Systems” isə müdafiə elektronikasının, quru, hava və dəniz sistemlərinin inkişafı sahəsində fəaliyyət göstərən qlobal müdafiə texnologiyası şirkətidir.
Sevinc Əliyeva
Ordu.az
