Ordu.az xəbər verir ki, Qriqoriadis Yunanıstan Hərbi Hava Qüvvələrinin modernləşmə planları barədə danışarkən xüsusilə Fransa ilə müdafiə əməkdaşlığının süni zəka, əməliyyat hədəflənməsi və yeni nəsil döyüş texnologiyaları sahəsində genişləndiyini bildirib.

Məlumata görə, yunan və fransız hərbi personalı dəqiq hədəfləmə və hava əməliyyatlarının planlaşdırılmasında süni zəka istifadəsinə yönəlmiş birgə layihələr həyata keçirir.

Qriqoriadis həmçinin Yunanıstan Hərbi Hava Qüvvələri daxilində “Kosmik Tətbiqlər Komandanlığı” adlı yeni strukturun yaradılmasının planlaşdırıldığını açıqlayıb. Onun sözlərinə görə, bu qurum Fransa ilə əməkdaşlıq çərçivəsində formalaşdırılır və kosmos əsaslı əməliyyatlar sahəsində Yunanıstanın imkanlarını artıracaq.

Yunanıstanın növbəti beş il ərzində “loyal wingman” konsepsiyasına malik insansız döyüş təyyarələrini də inventarına daxil etməyi nəzərdən keçirdiyi bildirilib. Bu platformaların kəşfiyyat, radioelektron mübarizə, hədəf aşkarlanması və yüksək riskli əməliyyatlarda dəstək missiyalarını yerinə yetirəcəyi qeyd olunur.

Qriqoriadis “Patriot” hava hücumundan müdafiə sistemlərinin effektivliyinə də toxunaraq “üç raketlə üç ballistik hədəfin məhv edildiyini” bildirib. Yunan komandan əlavə edib ki, havada yanacaq doldurma qabiliyyəti Kipr istiqamətində uzunmənzilli əməliyyatlarda ciddi “qüvvə çarpanı” rolunu oynayır.

Onun sözlərinə görə, “Rafale” döyüş təyyarələri, modernləşdirilmiş F-16 “Viper” parkı və yeni nəsil freqatlar Yunanıstanın Şərqi Aralıq dənizi və Kipr ətrafındakı müdafiə imkanlarını əhəmiyyətli dərəcədə gücləndirir.

Sevinc Əliyeva
Ordu.az