Ordu.az xəbər verir ki, Çin mənşəli HD-1 raketindən törədildiyi qiymətləndirilən yeni sistem həm quru hədəflərinə, həm də gəmilərə qarşı istifadə oluna biləcək.
“Clash Report”un məlumatına görə, “Fatah-3” Çinli “Guangdong Hongda” şirkəti tərəfindən hazırlanmış HD-1 raketinin Pakistan tərəfindən yerliləşdirilmiş versiyasıdır.
Yeni raket iki buraxılış qurğulu təkərli daşıyıcı-buraxıcı vasitə üzərinə inteqrasiya edilib. Bu quruluş sayəsində sistemin sürətli şəkildə yerləşdirilməsi və atışdan sonra mövqeyini dəyişməsi mümkün olur.
Paylaşılan məlumatlara görə, “Fatah-3” maksimum “Mach 3” ilə “Mach 4” sürətinə çata bilir.
Raketin mənzilinin 290 ilə 450 kilometr, döyüş başlığının çəkisinin isə 240 ilə 400 kiloqram arasında olduğu bildirilir.
Sistem dəqiq quru hücumu tapşırıqları ilə yanaşı, dəniz səthinə yaxın uçuş profili ilə gəmi əleyhinə tapşırıqlarda da istifadə olunmaq üçün hazırlanıb.
“Fatah-3”ün əsaslandığı HD-1 Çin tərəfindən beynəlxalq müdafiə sərgilərində supersəs gəmi əleyhinə və quru hücum raketi kimi təqdim edilmişdi.
Pakistanın bu infrastrukturu istifadə edərək yeni sistem hazırlaması sıfırdan mühərrik və yönləndirmə texnologiyası hazırlamaq ehtiyacını azaldıb və supersəs qanadlı raket qabiliyyətinin daha qısa müddətdə əldə olunmasını təmin edib.
“Fatah-3”dəki yerlilik nisbəti rəsmi olaraq açıqlanmasa da, sistemin Pakistan məhsulu kimi təqdim olunması mühüm səviyyədə yerli inteqrasiya və istehsal işlərinin həyata keçirildiyini göstərir.
“Fatah-3” Pakistanın son illərdə hazırladığı “Fatah” raket ailəsinin ən qabaqcıl üzvü hesab olunur.
Yeni raketin xidmətə qəbul edilməsi ilə Pakistan əvvəllər inventarında olmayan supersəs qanadlı raket qabiliyyətinə yiyələnib.
Bu inkişaf Hindistanın Rusiya ilə birgə hazırladığı və təxminən “Mach 2.8-3” sürətinə çatan “BrahMos” raketinə qarşı mühüm balans elementi kimi qiymətləndirilir.
“Fatah-3”ün gəmi əleyhinə tapşırıqlarda dəniz səthinə çox yaxın hündürlükdə uçaraq hədəfə yaxınlaşa bildiyi qeyd olunur.
Bu uçuş profili radarların aşkarlama mənzilini azaldarkən, müdafiə sistemlərinin reaksiya müddətini ciddi şəkildə qısaldır.
Supersəs sürəti ilə dəniz səthinə yaxın uçuşun birləşməsi müasir döyüş gəmilərinin təbəqəli hava hücumundan müdafiə sistemlərini aşma ehtimalını artırır.
Sevinc Əliyeva
Ordu.az
