Ordu.az xəbər verir ki, U145 mövcud H145 helikopterinin insansız versiyası kimi hazırlanıb.

Şirkət sərgi çərçivəsində yeni modelin tam ölçülü maketini nümayiş etdirəcək. U145in 2026-cı ilin sonuna qədər kabində təhlükəsizlik pilotunun iştirakı ilə ilk uçuşunu həyata keçirməsi, 2030-cu illərin əvvəllərində isə rəsmi olaraq xidmətə qəbul olunması planlaşdırılır.

“Airbus Helicopters” şirkətinin baş direktoru Matye Lüvo bildirib ki, U145 müştərilərə H145 platformasının avtonom və insansız versiyasını təqdim edir. Onun sözlərinə görə, layihədə H145-in özünü doğrultmuş korpusu, gücü və faydalı yük daşıma qabiliyyəti insansız hava sistemlərinin avtonom imkanları ilə birləşdirilib.

Lüvo həmçinin qeyd edib ki, U145in çoxməqsədli pilotsuz hava sistemi kimi imkanlarının genişləndirilməsi üçün Avropanın aparıcı avtonom sistem tərəfdaşları ilə əməkdaşlıq ediləcək.

U145 “Cabri G2” əsasında hazırlanmış VSR700-dən sonra “Airbus”ın insansız versiyaya çevirdiyi ikinci pilotlu helikopter olacaq.

Tam avtonom fəaliyyət üçün xüsusi sensor paketi və süni zəka ilə təchiz ediləcək platformada ənənəvi kokpit yerləşdirilməyəcək. Bunun əvəzinə logistik əməliyyatlar üçün inteqrasiya olunmuş burun qapısı, qatlanan yükləmə masası və xüsusi yük döşəməsi kimi konstruktiv dəyişikliklər tətbiq olunacaq.

Maksimum uçuş kütləsi 3800 kiloqram olan U145 həm mülki, həm də hərbi məqsədlər üçün çoxfunksiyalı platforma kimi hazırlanır. Modul konstruksiyası ona təbii fəlakətlərin nəticələrinin aradan qaldırılması, yanğınsöndürmə, silahlı kəşfiyyat, müşahidə və pilotlu-pilotsuz birgə əməliyyatlarda iştirak etməyə imkan verir.

Şirkət həmçinin MBDA ilə əməkdaşlıq çərçivəsində helikopteri havadan buraxılan sistemlər üçün “Pilotsuz uçuş. aparatı ana gəmisi” funksiyası ilə təchiz etməyi planlaşdırır.

Hazırda dünya üzrə hərbi, yarımdövlət və mülki missiyalarda istifadə olunan 1800-dən çox H145 ailəsinə məxsus helikopter mövcuddur. Bu platformalar ümumilikdə 8,5 milyon saatdan artıq uçuş həyata keçirib.

Sevinc Əliyeva
Ordu.az