Ordu.az xəbər verir ki, təxminən 3,16 milyard dollar dəyərində olan paket sursatla yanaşı təlim, texniki xidmət və inteqrasiya sistemlərini də əhatə edir.

Satış paketi 3,16 milyard dollar dəyərindədir

ABŞ tərəfindən Konqresə 2026-cı ilin yanvar ayında təqdim edilən satış çərçivəsində ümumi dəyərin 2,61 milyard dollarlıq hissəsini raketlər, 550 milyon dollarlıq hissəsini isə dəstək elementləri təşkil edir.

Paketə test vasitələri, texniki sənədlər, proqram təminatı, təlim sistemləri və mühəndislik dəstəyi də daxildir.

AIM-260A “Joint Advanced Tactical Missile” (JATM) mövcud AIM-120 AMRAAM raketlərini əvəz etmək üçün hazırlanır.

Raket daha uzun mənzil, radioelektron mübarizə mühitinə qarşı artırılmış dayanıqlıq və təhlükəsiz GPS yönləndirmə qabiliyyəti ilə seçilir.

F-35 parkı ilə uyğun istifadə

Satışın Avstraliyanın F-35A döyüş təyyarəsi parkı ilə uyğun şəkildə planlaşdırıldığı bildirilir. Raketin hava döyüşündə görmə məsafəsindən kənar nişanalma məsafəsini artıraraq əməliyyat effektivliyini yüksəltməsi hədəflənir.

Müqavilə çərçivəsində 5 ədəd inteqrasiya test vasitəsi və 30 ədəd idarəolunan sınaq sursatı da yer alır. Bu sistemlər raketin platformaya inteqrasiyası və əməliyyat təsdiqləmə proseslərində istifadə olunacaq.

İstehsalçı “Lockheed Martin”

Raketin əsas podratçısı olaraq “Lockheed Martin” açıqlanıb. Proqram ABŞ ilə müttəfiq ölkələr arasında “hava-hava” qabiliyyətlərinin uyğunluğunu artırmağı hədəfləyir.

Sevinc Əliyeva
Ordu.az