Ordu.az “The Caspian Post”a istinadən xəbər verir ki, OTOKAR-ın Qazaxıstandakı təşəbbüsü olan “Besqaru” zirehli texnika tədarükü üçün Pakistanın bir şirkəti ilə müqavilə imzalayıb.
Bu inkişaf Qazaxıstan Prezidenti Kasım Jomart Tokayevin Pakistana etdiyi rəsmi səfər çərçivəsində qeydə alınıb.
Müqavilə çərçivəsində Besqaru müəssisələrində istehsal olunan və VN-11 qülləsi ilə təchiz edilən COBRA II (AIBAR 4×4) zirehli texnikası ilə yanaşı ARMA 8×8 (TAIMAS 8×8) Zirehli Döyüş Maşını Pakistana təhvil veriləcək. Şirkət qeyd edib ki, bu zirehli texnikaların bütün istehsal prosesləri Qazaxıstanda yerli imkanlar hesabına həyata keçirilir.
ARMA 8×8 ZDM (TAIMAS 8×8)
Şirkət nümayəndələri bildirib ki, bu müqavilə Qazaxıstanın yerli müdafiə sənayesində əldə etdiyi yüksək inkişaf səviyyəsini və artan ixrac potensialını göstərir. Müqavilə yalnız tədarükü deyil, eyni zamanda satışdan sonrakı dəstək sistemlərinin yaradılması, servis və texniki xidmət infrastrukturu, texniki yardım və şəxsi heyətin hazırlanması kimi daha geniş sənaye əməkdaşlığını da əhatə edir. Bu isə texnikanın etibarlı və uzunmüddətli əməliyyat istifadəsi üçün zəmin yaradır.
“Besqaru” həmçinin qeyd edib ki, bu müqavilə “mahiyyəti etibarilə unikal”dır və Qazaxıstan ilə Pakistan arasında təkərli zirehli texnika seqmentində institusional əməkdaşlığın ilk nümunələrindən biridir. Müqavilənin ixracın genişlənməsinə, sənaye tərəfdaşlığının güclənməsinə və Qazaxıstanın yüksək texnologiyalı müdafiə məhsullarının qlobal mövqeyinin artmasına töhfə verəcəyi gözlənilir.
“Besqaru”nun zavodunda illik 200 ədədə qədər zirehli texnika istehsal gücü mövcuddur. Şirkətin məhsul portfelinə amfibi qabiliyyətli “Taimas” 8×8, “Aibar” 4×4 təkərli zirehli texnikaları, TULPAR tırtıllı zirehli döyüş maşınları və ALPAR pilotsuz quru vasitəsi daxildir.
“Besqaru” tərəfindən istehsal olunan zirehli texnikalar əsasən Qazaxıstan Müdafiə Nazirliyi olmaqla yanaşı digər təhlükəsizlik və hüquq-mühafizə qurumlarına tədarük edilir. İstehsal müəssisəsi 2025-ci ilin fevral ayında fəaliyyətə başlayıb və ümumilikdə 13,5 milyard tenge (26 milyon dollar) investisiya dəyərinə malik layihə çərçivəsində 134 nəfər işlə təmin olunub.
Sevinc Əliyeva
Ordu.az
