ABŞ ordusu müdafiə sənayesi nəhəngi “Northrop Grumman” ilə M1 “Abrams” əsas döyüş tankı (MBT) üçün yeni nəsil döyüş sursatlarının istehsalına dair yeni müqavilə imzalayıb.
Təxmini dəyəri 885 milyon ABŞ dolları olan beş illik çoxillik müqaviləyə əsasən, “Northrop Grumman” M1147 Advanced Multi-Purpose (AMP) mərmisini istehsal edəcək.
“Northrop Grumman”ın M1147 AMP mərmisi haqqında
Podratçı: “Northrop Grumman Innovation Systems” (əvvəlki adı “Orbital ATK”)
Mərmi tipi: 120 mm × 570 mm NATO (HEAT-MP-T)
Uzunluğu: 919 mm
Çəkisi: 27,68 kq
Lülədən çıxış sürəti: 1 150 m/s
Effektiv atəş məsafəsi:
Tank əleyhinə idarəolunan raket (ATGM) heyətləri və yüngül zirehli texnikaya qarşı: 50 m-2 000 m
Bunkerlər və maneələrə qarşı: 200 m-1 000 m
Kütləvi piyada qüvvələrinə qarşı: 200 m-5 000 m
120 mm-lik AMP tank mərmilərinin istehsalı “Northrop Grumman”ın Minnesota ştatının Plimut şəhərində yerləşən “Armament Systems” bölməsində həyata keçiriləcək.
M1147 mərmisini xüsusi edən nədir?
M1147 dörd “əvvəlki nəsil sursatı” əvəz etmək üçün hazırlanıb. Bunlara M830 yüksək partlayış qabiliyyətli tank əleyhinə mərmisi, M830A1 çoxməqsədli tank əleyhinə mərmisi, M1028 kaset mərmisi və M909 maneələrin məhv edilməsi mərmisi daxildir. Yeni mərmi tank əleyhinə, canlı qüvvəyə qarşı və maneələrin aradan qaldırılması imkanlarını bir sursatda birləşdirir və döyüşün qızğın vaxtında tank heyətlərinin müxtəlif sursat növləri arasında keçid etməsinə ehtiyacı aradan qaldırır.
AMP mərmisi proqramlaşdırılan alışdırıcı rejimlərindən istifadə edir ki, bu da onun təmas zamanı partlama, gecikdirilmiş təmas partlayışı və hava partlayışı rejimlərində işləməsinə imkan verir. Bu xüsusiyyət sayəsində o, tank əleyhinə idarəolunan raket (ATGM) heyətlərinə qarşı da istifadə oluna bilir. Mərmi həmçinin ikiqat armaturla möhkəmləndirilmiş beton divarları (DRCW) də deşə bilir.
“Artırılmış funksionallığı ilə M1147 AMP Ordunun səmərəlilik və döyüş hazırlığı tələblərinə cavab verir, eyni zamanda Abrams əsas döyüş tankının zərbə gücünü artırır. Bu imkan qüvvələrə istənilən təhlükəyə dərhal uyğunlaşmaq imkanı verərək misilsiz əməliyyat çevikliyi təmin edir”, - deyə “Northrop Grumman”ın Armament Systems bölməsinin vitse-prezidenti Deyv Fayn bildirib.
Müqaviləyə əsasən, M1147 AMP mərmiləri həm ABŞ ordusu, həm də Xarici Hərbi Satışlar (FMS) proqramı çərçivəsində istehsal olunacaq. Proqram 2020-ci il dekabr ayında “Milestone C” mərhələsinə daxil olub, ABŞ ordusu tərəfindən ilk sınaq atəşi 2021-ci il sentyabr ayında həyata keçirilib və 2025-ci il yanvar ayında tammiqyaslı seriya istehsalına (FRP) başlanılıb.
“2025-ci ildə M1147 AMP mərmisinin tammiqyaslı seriya istehsalına icazə verilməsi komandamızın illərlə davam edən fədakar əməyinin və əsgərləri ən yaxşı sursatla təmin etmək öhdəliyimizin mühüm göstəricisidir. Bu qabaqcıl mərminin istehsalını davam etdirdikcə M1147 M1 “Abrams” əsas döyüş tankına üstün döyüş imkanları və daha yüksək məhvetmə gücü qazandırmaqda mühüm rol oynayacaq”, - deyə JPEO A&A rəhbəri general-mayor Con T. Reym 2025-ci ildə FRP elan edilərkən bildirib.
M1147 “Advanced Multi-Purpose” mərmisinin hazırlanmasına 2013-cü ildə başlanılıb və yalnız tam on il davam edən tədqiqat, sınaqlar və proqramın təkmilləşdirilməsindən sonra AMP sursatının tammiqyaslı seriya istehsalına icazə verilib.
ABŞ ordusu əlavə edib ki, əvvəlki dörd növ sursatın bir mərmidə birləşdirilməsi logistikanın səmərəliliyini artıracaq, M1 “Abrams” əsas döyüş tanklarının daşıdığı əsas sursat yükünü sadələşdirəcək və köhnəlmiş sursat ehtiyatları probleminin həllinə kömək edəcək. Ötən il tammiqyaslı seriya istehsalına başlanılması ABŞ ordusunun döyüş hazırlığına və modernləşdirmə prioritetlərinə sadiqliyini bir daha nümayiş etdirib.
Sevinc Əliyeva
Ordu.az
