Ordu.az xəbər verir ki, TÜBİTAK SAGE, ASELSAN və ROKETSAN tərəfdaşlığı ilə həyata keçirilən SİPER Uzun Mənzilli Regional Hava və Raketdən Müdafiə Sistemi Layihəsi çərçivəsində hazırlanmış raketin layihə məsuliyyəti TÜBİTAK SAGE tərəfindən icra olunur.
Uzun mənzilli hava hücumundan müdafiədə kritik mərhələ
SİPER “Blok-2” Türkiyənin uzun mənzilli hava və raketdən müdafiə qabiliyyətini gücləndirməyi hədəfləyən ən vacib layihələrdən biri kimi ön plana çıxır. Uğurla tamamlanan atışlı sınaq sistemin operativ istifadəyə keçid prosesində mühüm bir mərhələnin geridə qaldığını göstərir.
“Polad Günbəz” arxitekturasının ən üst təbəqəsini təşkil edən sistemin döyüş təyyarələri, qanadlı raketlər, “hava-yer” sursatları və pilotsuz uçuş aparatları kimi geniş təhdid spektrinə qarşı fəaliyyət göstərməsi planlaşdırılır.
Qabaqcıl nişanalma və şəbəkə dəstəkli müharibə qabiliyyəti
SİPER “Blok-2” müasir hava hücumundan müdafiə tələblərinə uyğun olaraq hazırlanmış qabaqcıl komanda-idarəetmə və nişanalma qabiliyyətləri ilə seçilir.
Sistem:
Eyni anda çoxsaylı hədəfə nişanalma
Təhdidin qiymətləndirilməsi və avtomatik silah bölgüsü
Çoxsaylı radar məlumatlarının birləşdirilməsi
Raket ilə iki istiqamətli məlumat bağlantısı
Aktiv radar axtarış başlığı ilə terminal mərhələdə yönləndirmə
kimi əsas xüsusiyyətlər sayəsində yüksək effektivlik təmin edir.
Bundan əlavə, sistem “Link-16” və JREAP məlumat əlaqələri vasitəsilə Türkiyə Hərbi Hava Qüvvələri, Quru Qoşunları və Hərbi Dəniz Qüvvələri ilə inteqrasiya olunaraq birgə əməliyyat qabiliyyəti yaradır.
150 kilometrdən artıq mənzil hədəfi
SİPER “Blok-2”nin 150 kilometrdən artıq qarşısını alma mənzili ilə geniş hava məkanında effektiv müdafiə təmin etməsi planlaşdırılır. Sistem 360 dərəcə nişanalma qabiliyyəti sayəsində müxtəlif istiqamətlərdən gələn təhdidlərə qarşı fasiləsiz qorunma yaradır.
Batareya səviyyəsində 100 hədəfi izləyə bilən sistem eyni anda 10 hədəfə nişanalma həyata keçirə bilir və 20 raketi paralel şəkildə yönləndirə bilir.
Sevinc Əliyeva
Ordu.az
