Ordu.az xəbər verir ki, bu barədə Ermənistanın “Past” nəşri “Tsargrad.tv” saytında dərc olunan “Ermənistan seçkilərində əslində kim qalib gəldi? Paşinyan dəhşətli bir həqiqəti anlayıb: siyasi uğurunun qiyməti həddindən artıq yüksəkdir” sərlövhəli məqaləyə istinadən yazıb.
Məqalədə qeyd olunur ki, Nikol Paşinyanın rəhbərlik etdiyi “Vətəndaş Müqaviləsi” partiyası seçkilərdə 49,8 faiz səs toplayaraq parlamentdə çoxluğa sahib olub və yeni hökuməti müstəqil şəkildə formalaşdırmaq imkanı əldə edib. Lakin bu nəticə Konstitusiyada dəyişiklik etmək üçün kifayət etmir.
Nəşrin yazdığına görə, Azərbaycanla sülh sazişinin imzalanması üçün vacib hesab edilən konstitusiya referendumu keçirmək məqsədilə hakim partiyanın daha geniş dəstəyə ehtiyacı var. Bakı Ermənistan Konstitusiyasında Qarabağa aid müddəaların çıxarılmasını tələb edir.
Siyasi şərhçi Artur Atayev “Tsargrad.tv” telekanalının “Biz xəbərdarıq” proqramında bildirib ki, əgər Paşinyanın tərəfdarları 65 faizdən çox səs toplasaydılar, digər siyasi qüvvələrin iştirakı olmadan referendum təşəbbüsü ilə çıxış edə bilərdilər.
“Lakin hazırkı vəziyyətdə hakimiyyət müxalifətdən, o cümlədən belə referendumun əleyhinə olan rusiyameyilli partiyalardan dəstək almağa məcburdur. Ermənistanda baş verən hadisələrin bir neçə ölçüsü var. Birincisi siyasi ölçüdür. Bu, şübhəsiz ki, Avropa İttifaqının qələbəsidir. Bu, hətta Paşinyanın qələbəsi də deyil. Ursula fon der Lyayen onu təbrik etməyə tələsdi. Eyni addımı istisnasız olaraq bütün Qərb ölkələrinin liderləri atdılar. Paşinyanı Avropa siyasi koalisiyasındakı yeni tərəfdaşı Volodimir Zelenski də təbrik etdi.
Bu baxımdan söhbət siyasi uğurdan gedir. Qərb liderlərinin Paşinyana ünvanladıqları isti və tərif dolu sözlərə əsaslansaq, bu, məhz belə görünür. Bu, postsovet məkanında Avropa İttifaqının siyasi uğurudur”, - deyə Atayev bildirib.
Məqalədə vurğulanır ki, proseslərin iqtisadi tərəfi də mövcuddur və məhz burada Paşinyan ciddi problemlə üzləşib.
“Paşinyan dəhşətli bir həqiqəti anlayıb: onun siyasi uğurunun qiyməti həddindən artıq yüksəkdir. Rusiya ilə ticarət dövriyyəsi görünməmiş səviyyədədir və 6,4 milyard dollar təşkil edir. Bu, çox böyük rəqəmdir. Avropa İttifaqı Ermənistan üçün belə göstərici təmin edə bilməz. Bundan əlavə, Rusiyadan investisiya axını da mövcuddur.
Belə şəraitdə siyasi qələbə əldə olunsa da, bu, iqtisadi çöküşlə müşayiət oluna bilər. Paşinyan bunu başa düşür. O, seçkilərdə qalib gələ bilər, lakin bibər, çəyirdəkli meyvələr və güllərin idxalına qoyulan qadağalar ciddi nəticələrə səbəb olacaq.
Tədrici və ya qəfil baş verə biləcək ciddi iqtisadi çöküş ehtimalı mövcuddur. Ermənistan iqtisadiyyatının ən azı 45 faizinin kiçilə biləcəyi istisna olunmur. Paşinyan isə bunu boş siyasi bəyanatlarla izah edə bilməyəcək”, - deyə siyasi şərhçi vurğulayıb.
Nəşr qeyd edir ki, Ermənistan hakimiyyətinin qarşısında duran əsas problemlərdən biri siyasi dəstəyi iqtisadi sabitliyə çevirməkdir. Məqalə müəllifinin fikrincə, yaxın dövrdə Ermənistanın həm daxili siyasi, həm də iqtisadi vəziyyəti ciddi sınaqlarla üzləşə bilər.
Alpər Mövludoğlu
Ordu.az
