Ordu.az xəbər verir ki, daha əvvəl Niderland Hərbi Dəniz Qüvvələrinin tərkibində “Zr.Ms. Makkum” adı ilə xidmət göstərən gəmi Ukrayna donanmasına daxil olduqdan sonra “Heniçesk” adını alıb.
Təhvil mərasimi iyunun 15-də Ukrayna Hərbi Dəniz Qüvvələrinin komandanı vitse-admiral Oleksii Neijpapanın iştirakı ilə keçirilib. Mərasimdə həmçinin Niderland, Belçika, Rumıniya, Litva və Latviya hərbi dəniz qüvvələrinin yüksək vəzifəli nümayəndələri iştirak ediblər.
Dəniz Qabiliyyətləri Koalisiyası çərçivəsində təhvil verilib
Gəminin təhvili Böyük Britaniya və Norveçin rəhbərliyi ilə 2023-cü il dekabrın ayında yaradılan Dəniz Qabiliyyətləri Koalisiyası (Maritime Capabilities Coalition) çərçivəsində həyata keçirilib.
20-dən çox ölkənin iştirak etdiyi koalisiya Ukraynanın Qara dənizdəki dəniz gücünün yenidən qurulmasını və modernləşdirilməsini hədəfləyir. Bu çərçivədə Qərb ölkələrinin silahlanmadan çıxardığı gəmilərin Ukraynaya verilməsi, ekipaj hazırlığı və texniki modernləşdirmə işləri aparılır.
Yeni təhvil verilən “Heniçesk” ilə birlikdə Ukraynanın mina əleyhinə tədbirlər donanmasındakı gəmilərin sayı beşə çatıb.
Müasir sensorlar və sualtı sistemlərlə təchiz edilib
“Alkmaar” sinfinə məxsus mina axtaran gəmilər Belçika, Fransa və Niderland tərəfindən birgə hazırlanıb. 1980-ci və 1990-cı illərdə ümumilikdə 35 gəmi inşa olunub.
2003-cü ildən etibarən Niderlandın silahlanmasında olan gəmilər genişmiqyaslı modernləşdirmə proqramlarından keçirilib. Bu çərçivədə “Atlas Elektronik” INCMS döyüş idarəetmə sistemi, “Thales 2022 Mk III” sonar sistemi, eləcə də “Atlas Seafox” və “Double Eagle Mk III Mod 1” uzaqdan idarə olunan sualtı platformaları inteqrasiya edilib.
Bu sistemlər sayəsində gəmi minaları təhlükəsiz məsafədən aşkar edib məhv edə bilir və dalğıcların riskli əməliyyatlara cəlb olunmasının qarşısını alır.
Mina təhlükəsinə qarşı xüsusi konstruksiya
Təxminən 543 ton subasımı qabiliyyətinə malik “Alkmaar” sinfinə məxsus gəmilər 51,5 metr uzunluğa malikdir və maksimal 13 düyün sürət yığa bilir. Gəmidə 28-38 nəfər heyət xidmət göstərə bilir.
Platformanın ən diqqətçəkən xüsusiyyətlərindən biri maqnit minalarına qarşı xüsusi hazırlanmış gövdə konstruksiyasıdır. Kompozit əsaslı şüşə-lifli materialdan hazırlanan gövdə gəminin maqnit izini əhəmiyyətli dərəcədə azaldaraq mina təhlükəsinə qarşı sağqalma imkanlarını artırır.
“Heniçesk” adı yenidən Ukrayna donanmasında
Yeni gəmiyə verilən “Heniçesk” adı Ukrayna Hərbi Dəniz Qüvvələri üçün simvolik məna daşıyır.
Əvvəlki “Heniçesk” Proyekt 1258 sinfinə məxsus liman minaaxtaran gəmisi idi. O, 2022-ci ilin iyununda Kinburn burnu yaxınlığında xüsusi təyinatlı bölmələrə dəstək tapşırığı yerinə yetirərkən Krımdan buraxılan Rusiya qanadlı raketlərinin hədəfinə çevrilərək batırılmışdı.
Gəminin komandiri Oleksandr Boyçuk hücumdan sonra Rusiya qüvvələri tərəfindən əsir götürülmüş, illər sonra həyata keçirilən əsir mübadiləsi nəticəsində Ukraynaya qayıtmışdı.
Vitse-admiral Oleksii Neijpapa mərasimdə bildirib: “Niderlandlı tərəfdaşlarımız Dəniz Qabiliyyətləri Koalisiyası çərçivəsində Ukrayna Hərbi Dəniz Qüvvələrinə “Alkmaar” sinfinə məxsus mina axtaran gəmi təhvil veriblər. Bu platforma minaların axtarılması, aşkar olunması və zərərsizləşdirilməsi sahəsində imkanlarımızı əhəmiyyətli dərəcədə gücləndirəcək”.
Ukraynanın mina əleyhinə donanması genişlənir
“Heniçesk” daha əvvəl Ukraynaya verilmiş “Cherkasy” və “Chernihiv” adlı Sandown sinfinə məxsus mina axtaran gəmilərə, eləcə də “Melitopol” və “Mariupol” adlı “Alkmaar” sinfinə məxsus platformalara qoşulub.
Qara dənizin dünyanın ən sıx minalanmış dəniz bölgələrindən birinə çevrildiyi hazırkı şəraitdə bu platformaların Ukraynanın dəniz təhlükəsizliyi və ticarət marşrutlarının qorunması baxımından mühüm rol oynayacağı gözlənilir.
Müharibə səbəbindən gəmilər hazırda müvəqqəti olaraq Böyük Britaniyada yerləşdirilib. Yeni “Heniçesk” gəmisinin isə 2027-ci ildə keçiriləcək “Sea Breeze” çoxmillətli dəniz təlimində iştirak etməsi planlaşdırılır.
Sevinc Əliyeva
Ordu.az
