Ordu.az xəbər verir ki, bu barədə “The Guardian” məlumat yayıb.
Məlumata görə, Fertitta İtaliya sahilləri boyunca təşkil olunan tur çərçivəsində uzunluğu 117 metr olan superyaxtası ilə iyulun 17-də Venesiyaya gəlməyi planlaşdırır.
Yerli fəallar hesab edirlər ki, şəhərin tarixi mərkəzinə bu ölçüdə şəxsi yaxtanın daxil olması varlı şəxslərin həddindən artıq təsirinin və Venesiyanın getdikcə daha çox kommersiyalaşdırılmasının növbəti nümunəsinə çevriləcək.
Cümə axşamı keçirilən fəalların toplantısında iştirak edən tədqiqatçı və ictimai fəal Stella Faen bildirib: “Keçən il Ceff Bezosun bayramını pozduq, bu il isə gəlin səfirin səfərini pozaq”.
Fertittanın səfəri ABŞ-nin müstəqilliyinin 250 illiyinə və Roma ilə Vaşinqton arasında münasibətlərin möhkəmləndirilməsinə həsr olunan “Coastal Diplomacy 250” təşəbbüsü çərçivəsində həyata keçiriləcək.
Fəalların sözlərinə görə, superyaxta Venesiyanın ən mühüm dini və mədəni tədbirlərindən biri olan “Redentore” bayramı günlərində şəhərin tarixi hissəsində lövbər sala bilər.
Hər il XVI əsrdə taun epidemiyasının başa çatmasına həsr olunan bu bayram zamanı şəhərdə müvəqqəti ponton körpü qurulur və axşam saatlarında minlərlə sakin və turistin izlədiyi möhtəşəm atəşfəşanlıq təşkil edilir.
Etirazçılar hesab edirlər ki, belə böyük yaxtanın həmin ərazidə dayanması mənzərəni bağlaya və bayramın gedişinə mənfi təsir göstərə bilər.
“Redentore Venesiyanın hələ də şəhər sakinlərinə məxsus olan nadir anlarından biridir”, - deyə Stella Faen bildirib.
Mənbələrin məlumatına görə, Fertittanın yaxtası altı göyərtəyə, iki helikopter meydançasına və bir neçə üzgüçülük hovuzuna malikdir. Onun dəyəri təxminən 450 milyon dollar qiymətləndirilir.
“Venezia Terminal Passeggeri” operatorunun məlumatına əsasən, bu ölçüdə gəmilər üçün şəhər mərkəzində dayanacaq yerləri məhduddur və əsasən Punta della Doqana və ya Riva dei Sette Martiri sahil zolağında yerləşir. Həmin məkanlar şəhər sakinlərinin sevimli istirahət və müşahidə nöqtələrindən hesab olunur.
Etiraz hərəkatının digər iştirakçısı Culiya Kakaporto bildirib ki, belə bir yaxtanın Venesiyaya daxil olmasına icazə verilməsi şəhər sakinlərinə qarşı hörmətsizlikdir.
Onun sözlərinə görə, yaşayış şəraitinin getdikcə pisləşdiyi və insanların mənzil tapmaqda çətinlik çəkdiyi bir vaxtda varlı şəxslər özlərini hər şeyə haqqı çatan insanlar kimi aparırlar.
Fəallar hesab edirlər ki, bu vəziyyət Venesiyanın zəngin turistlər üçün nümayiş məkanına çevrildiyini, şəhərin isə yerli əhali üçün getdikcə daha az yaşanılacaq yer olduğunu göstərir.
Sevinc Əliyeva
Ordu.az
