Ordu.az xəbər verir ki, sifariş döyüş maşınları, dəniz platformaları və hava hücumundan müdafiə sistemlərini əhatə edən ümumi dəyəri 5,7 milyard avro olan genişmiqyaslı tədarük paketinin bir hissəsidir.
Paket çərçivəsində əlavə olaraq 7 ədəd “Skynex” hava hücumundan müdafiə sistemi və dəniz platformaları üçün 2 ədəd Millennium Gun sistemi də alınacaq. “Rheinmetall”ın açıqlamasına görə, “Skyranger 35” sistemləri şirkətin yeni nəsil “Lynx” KF41 tırtıllı zirehli döyüş maşını üzərində inteqrasiya ediləcək.
“Skyranger 35” yüksək hərəkət qabiliyyətini, qabaqcıl sensorları və güclü atəş imkanlarını bir platformada birləşdirərək qısa və çox qısa mənzilli hava təhdidlərinə qarşı effektiv müdafiə təmin etməyi hədəfləyir.
Sistem xüsusilə Pilotssuz Uçuş Aparatlarına (PUA), PUA sürülərinə, “gəzən sursat”lara və alçaq hündürlükdən gələn hava təhdidlərinə qarşı istifadə üçün hazırlanıb.
“Skyranger 35” proqramlaşdırıla bilən AHEAD sursatından istifadə edən yüksək dəqiqlikli 35 mm çaplı “revolver” topu ilə təchiz olunub.
Kompleks radiolokasiya sensorlarını, elektro-optik izləmə sistemlərini və hava hücumundan müdafiə silahlarını bir zirehli platformada birləşdirir. Bu xüsusiyyətlər sayəsində sistem hərəkət zamanı belə hava məkanını müşahidə edə və hədəflərə avtonom şəkildə nişanalma həyata keçirə bilir.
“Rheinmetall”ın Hava Hücumundan Müdafiə Sistemləri bölməsinin rəhbəri Oliver Dürr bildirib ki, Rumıniyanın bu seçimi Avropanın hava müdafiəsi baxımından mühüm mərhələdir.
Onun sözlərinə görə, Rumıniyanın “Lynx” platforması üzərindəki “Skyranger 35” sisteminə üstünlük verməsi Avropa hava müdafiəsi üçün əhəmiyyətli addımdır.
Dürr əlavə edib ki, son dövrlərdə Rumıniya hava məkanında baş verən PUA hadisələri qısa mənzilli hava hücumundan müdafiə sistemlərinə olan ehtiyacın vacibliyini nümayiş etdirib.
“Rheinmetall” şirkəti qeyd edib ki, bu müqavilə Rumıniya ilə uzunmüddətli əməkdaşlığı daha da möhkəmləndirir.
Şirkətin məlumatına görə, Rumıniya həm öz ərazisinin müdafiəsini gücləndirmək, həm də NATO-nun şərq cinahında çəkindirmə imkanlarını artırmaq məqsədilə müdafiə sahəsinin modernləşdirilməsini sürətləndirir.
Həmçinin vurğulanıb ki, müqavilə NATO ölkələri arasında standartlaşdırma və qarşılıqlı fəaliyyət qabiliyyətinin inkişafına da töhfə verəcək.
Sevinc Əliyeva
Ordu.az
