Ordu.az xəbər verir ki, bu sifariş 2026-cı ilin may ayında imzalanan və ümumi dəyəri 98 milyon dollara çatan yeni müqavilə çərçivəsində həyata keçirilən ilk tədarük olub.
Vasitələr müxtəlif missiya avadanlıqları və xüsusi aksesuar paketləri ilə birlikdə təhvil veriləcək.
ABŞ Dəniz Piyadaları tərəfindən verilən sifariş beş ilədək qüvvədə qalacaq və əlavə alışlara imkan yaradan Qeyri-Müəyyən Təchizat - Qeyri-Müəyyən Miqdar (IDIQ) müqaviləsi çərçivəsində həyata keçirilib.
“Polaris Government and Defense” ilə 2026-cı il mayın 22-də imzalanmış müqavilənin ümumi dəyərinin 98 milyon dollar olduğu açıqlanıb. İlk mərhələdə isə 70-dən çox MRZR “Alpha” vasitəsinin alınması nəzərdə tutulub.
Sifariş edilən vasitələrin yarıdan çoxu xüsusi konfiqurasiyaya malik olacaq və birbaşa vasitə üzərindən 5 kilovat elektrik enerjisi təmin edə biləcək.
Bu xüsusiyyət sayəsində MRZR “Alpha” rabitə sistemləri, sensorlar, radioelektron mübarizə avadanlıqları və yüksək enerji tələbi olan digər sistemlər üçün mobil enerji mənbəyi kimi istifadə olunacaq.
“Polaris Government and Defense” şirkətinin Müdafiə Proqramları üzrə meneceri Erin Telander bildirib ki, şirkətin mühəndislik və inkişaf işləri Dəniz Piyadalarının ehtiyaclarına uyğun yeni aksesuarların hazırlanmasına imkan verib.
Onun sözlərinə görə, bu yeniliklər arasında vasitədən birbaşa 5 kilovat enerji ötürülməsi imkanı da yer alır.
MRZR “Alpha” uzun illərdir xüsusi təyinatlı qüvvələr və kəşfiyyat bölmələri tərəfindən istifadə olunan MRZR ailəsinin ən qabaqcıl versiyası hesab olunur. Vasitə artırılmış yükdaşıma qabiliyyəti, təkmilləşdirilmiş keçid imkanları və hava nəqliyyatı ilə daşınmaya uyğun quruluşu ilə seçilir.
Sistem helikopterlər və konvertoplanlarla daşına bilir ki, bu da bölmələrin ehtiyac duyulan ərazilərə sürətli şəkildə çatdırılmasına imkan yaradır. Müqavilə çərçivəsində vasitələrlə yanaşı çoxsaylı missiya avadanlıqları da təhvil veriləcək.
Bunlara ikitərəfli kamuflyaj örtüyü, yol hərəkəti avadanlıqları, modul yükdaşıma sistemi, gücləndirilmiş arxa qapı, xərək daşıma dəstləri, yedəkləmə avadanlıqları və yanğınsöndürmə sistemləri daxildir.
Beləliklə, eyni vasitə kəşfiyyat, patrul, yaralıların təxliyəsi, logistika dəstəyi və ya irəli bazalarda enerji təminatı kimi müxtəlif vəzifələrdə istifadə oluna biləcək.
Sevinc Əliyeva
Ordu.az
