Ordu.az xəbər verir ki, bununla F-35 proqramına daha bir yeni sifariş əlavə olunub.
İyunun 9-da imzalanan müqaviləyə əsasən, “Lockheed Martin” 11 ədəd F-35 “Lightning II” döyüş təyyarəsinin istehsalı üçün uzun istehsal müddəti tələb edən kritik hissə və materialları təmin edəcək.
ABŞ Müharibə Nazirliyi təyyarələrin hansı ölkə üçün istehsal olunacağını açıqlamasa da, sifarişin ABŞ-nin Xarici Hərbi Satışlar proqramı çərçivəsində həyata keçirildiyini bildirib.
Müqavilə yekun istehsal mərhələsindən əvvəl həyata keçirilən və uzunmüddətli tədarük prosesi kimi tanınan mərhələni əhatə edir. Bu üsul radar sistemləri, mühərrik komponentləri, elektron avadanlıqlar və kompozit konstruksiyalar kimi istehsalı uzun çəkən hissələrin əvvəlcədən sifariş edilməsinə imkan yaradır.
İşlərin 2030-cu ilin dekabrında başa çatdırılması planlaşdırılır. Təyyarələrin təhvilinin isə bundan sonra həyata keçiriləcəyi gözlənilir.
F-35 proqramı F-35A, F-35B və F-35C olmaqla üç variantdan ibarətdir. Bu platformalar ortaq sensor, radar və radioelektron mübarizə infrastrukturu paylaşır, aşağı görünmə xüsusiyyətləri və qabaqcıl məlumat mübadiləsi imkanları ilə seçilir.
Bu günədək dünyada 1300-dən çox F-35 təhvil verilib. Mövcud və gələcək sifarişlər nəzərə alınmaqla ümumi istehsal həcmi 3400 təyyarəni ötüb.
Müqavilə çərçivəsində işlərin əsas hissəsi “Lockheed Martin”in Texas ştatındakı “Fort Worth” müəssisəsində həyata keçiriləcək. Qalan istehsal prosesləri isə Kaliforniya, Böyük Britaniya və İtaliyadakı müəssisələr arasında bölüşdürüləcək.
Sevinc Əliyeva
Ordu.az
