Ordu.az xəbər verir ki, bu barədə Ermənistan Korrupsiyaya Qarşı Mübarizə Komitəsi məlumat yayıb.

Məlumatda bildirilib ki, seçki rüşvəti vermə və alma halları ilə bağlı başladılmış cinayət işi çərçivəsində 8 nəfər barəsində cinayət təqibi başlanıb və hazırda prosessual hərəkətlər davam etdirilir.

“Zərurət yaranarsa əlavə məlumat veriləcək”, - deyə komitədən bildirilib.

Daha əvvəl Ermənistan KİV-ləri yazmışdı ki, hüquq-mühafizə orqanları bu gün “Güclü Ermənistan” blokunun Ağrı vilayətindəki ofisində axtarış aparıblar və saxlanılan şəxslər var.

Erməni vəkil Tiqran Hayrapetyan bildirib ki, mayın 27-si səhər saat 07:00 radələrində “Güclü Ermənistan” partiyasının 8 tərəfdarı saxlanılıb və Ermənistan Korrupsiyaya Qarşı Mübarizə Komitəsinə aparılıb.

“Lakin vəkillərin prosesə qoşulmasına imkan verilməyib, onlar dindirmələrdə iştirak edə bilmirlər və fəaliyyətlərinə maneələr yaradılır”, - deyə erməni vəkil qeyd edib.

Bu məsələ ilə bağlı Tiqran Hayrapetyan cinayət barədə müraciət təqdim etdiyini, lakin hələlik heç bir cavab verilmədiyini bildirib.

Alpər Mövludoğlu
Ordu.az