Ordu.az xəbər verir ki, sahədən paylaşılan son görüntülərdə TURUL hərəkətli və sabit hədəf təqibi, gecə əməliyyat qabiliyyəti və QR kod əsaslı dəqiq eniş qabiliyyətini uğurla nümayiş etdirib.
Türkiyənin aparıcı müdafiə və texnologiya şirkətlərindən olan “STM Müdafiə Texnologiyaları Mühəndislik və Ticarət A.Ş.” milli imkanlarla hazırladığı pilotsuz uçuş aparatlarının sınaq fəaliyyətlərini davam etdirir.
STM-in IDEF-2025 sərgisində ilk dəfə nümayiş etdirdiyi, şaquli eniş-qalxma qabiliyyətinə malik STM VTOL pilotsuz uçuş aparatı TURUL sahə sınaqları mərhələsində kritik mərhələləri geridə qoyub. Buludaltı əməliyyatlarda fərq yaradan və kəşfiyyat, kəşf və müşahidə (ISR) tapşırıqları üçün optimallaşdırılan TURUL həyata keçirilən sınaq uçuşlarında avtonom qabiliyyətlərindən tam qiymət alıb. Sahədən paylaşılan son görüntülərdə TURUL avtonom qalxma və naviqasiyasından sonra sabit və hərəkətli hədəflərin təqibini tamamlayaraq uğurla eniş edir. Kalifikasiya sınaqları davam edərkən STM bünyəsində seriyalı istehsala hazırlıq işləri də paralel şəkildə davam edir.
Adını türk mifologiyasında gücü, əsaləti və göy üzərində mütləq hakimiyyəti təmsil edən əfsanəvi ovçu quşdan alan TURUL şaquli eniş-qalxma qabiliyyəti ilə əməliyyat sahəsinin yeni qoruyucusu olmağa hazırlaşır.
Buludaltı əməliyyat qabiliyyəti ilə fasiləsiz müşahidə təqdim edirik
TURUL-un uğurla davam edən sınaq prosesləri ilə bağlı qiymətləndirmələr verən STM-in baş direktoru Özgür Güleryüz platformanın müasir müharibə doktrinasındakı yerinə diqqət çəkərək bunları bildirib:
“Müasir müdafiə ekosistemində platformaların sadəcə uçması deyil, sahədəki məlumatı nə qədər sürətli və təhlükəsiz emal etdiyi kritik əhəmiyyət daşıyır. Sabit qanadlı pilotsuz uçuş aparatlarımızın əməliyyat mənzili üstünlüyünü şaquli eniş-qalxma çevikliyi ilə birləşdirərək uçuş-eniş zolağı infrastrukturu məcburiyyətini aradan qaldıran bir həll ortaya qoyduq. Dəniz platformalarından və ya istənilən quru nöqtəsindən qalxma və eniş edə bilən TURUL xüsusilə buludaltı əməliyyat qabiliyyəti sayəsində çətin hava şəraitində və yüksək irtifa tələb edən tapşırıqlarda belə görüntüdən ayrılmadan fasiləsiz kəşfiyyat təmin edir. Radioelektron mübarizəyə davamlı, milli proqram təminatı ilə təchiz edilmiş bu sistemimizlə sərhəd təhlükəsizliyindən strateji obyektlərin qorunmasına qədər hər sahədə tam müstəqillik vizyonumuza daha bir töhfə veririk”.
QR kod ilə millimetrik eniş
Sınaq fəaliyyətlərində uğurla tətbiq olunan QR kod işarələyicisi əsaslı eniş və “mmWave” radar dəstəyi sistemin avtonom şəkildə müəyyən edilmiş nöqtəyə millimetr dəqiqliyi ilə qayıtmasını təmin edir. 2 saatdan artıq havada qalma müddəti və 200 kilometrlik uçuş mənzili ilə TURUL taktiki kəşfiyyat, sahə müşahidəsi və hədəf aşkarlanması tapşırıqlarında uçdan-uça həll təqdim edir.
TURUL ilə uzun əməliyyat müddəti
STM tərəfindən hazırlanan Sabit Qanadlı VTOL Pilotsuz Uçuş Aparatı Sistemi TURUL uçuş-eniş zolağı ehtiyacını aradan qaldıran quruluşu və avtonom tapşırıq qabiliyyəti ilə həm hərbi, həm də mülki əməliyyatlarda çoxşaxəli imkan təqdim edir. Uzun havada qalma müddəti və yüksək faydalı yük tutumu ilə seçilən sistem kəşf, müşahidə (ISR), sursat buraxılması, suüstü mina axtarışı tapşırıqlarını avtonom şəkildə yerinə yetirə bilir. İnteqrasiya olunmuş EO/IR görüntüləmə sistemləri sayəsində gecə və gündüz tapşırıqları yerinə yetirə bilən TURUL tək şəxslə qısa müddətdə istifadəyə hazır vəziyyətə gətirilə bilir.
Qabiliyyətlər
Aşkarlama, Müşahidə, Kəşfiyyat
Şaquli qalxma-enmə qabiliyyəti
QR işarələyicisi əsaslı dəqiq eniş qabiliyyəti
“mmWave” radar dəstəkli dəqiq avtonom eniş qabiliyyəti
EO/IR görüntüləmə sistemi ilə real vaxt rejimində görüntü ötürülməsi
Uzun havada qalma və geniş tapşırıq radiusu
GNSS qarışdırmasına davamlı naviqasiya
Tapşırıq planlaşdırılması və avtonom uçuş qabiliyyəti
Gecə/gündüz əməliyyat qabiliyyəti
Texniki xüsusiyyətlər
Uçuş mənzili: 200 km
Rabitə mənzili: 60 km (LOS)
Əməliyyat uçuş hündürlüyü: 2000 m (MSL)
Uçuş müddəti: 2 saat
Qalxma çəkisi: 35 kq
Qanad açılımı: 3.6 m
İşləmə temperaturu: -20 / +50 °C
Sevinc Əliyeva
Ordu.az
