Ordu.az xəbər verir ki, bu inkişaf şirkətin rəsmi internet saytı üzərindən elan olunub.
Təyyarənin xüsusilə Moskva ilə siyasi baxımdan yaxın xəttdə olan ölkələr tərəfindən böyük maraq gördüyü bildirilib. Şirkətin açıqlamasında qeyd edilib: “Su-57E” tərəfdaşlarımız tərəfindən böyük maraq görür və bəzi ölkələr bu döyüş təyyarəsi üçün artıq müqavilə imzalayıb. Müştəri siyahısı sabit şəkildə genişlənir”.
Əlcəzair və qeyri-müəyyənliklər
Bu günə qədər “Su-57E”nin təsdiqlənmiş yeganə xarici istifadəçisi Əlcəzair olaraq ön plana çıxır. Lakin təyyarələrin təhvili uzun müddət ictimaiyyətə açıqlanmayıb və müqavilənin detalları gizli saxlanılıb.
Buna baxmayaraq, 2025-ci ilin sonu və 2026-cı ilin əvvəlində müşahidəçilər sözügedən təyyarələrin Əlcəzair hava məkanında və hava qüvvələri bazalarında daha tez-tez fəaliyyət göstərdiyini qeyd ediblər. Bu vəziyyət platformanın faktiki olaraq xidmətə qəbul edildiyinə işarə edib.
Əlcəzairin mümkün tədarük prosesi 2019-cu ildə ölkə heyətinin Rusiyadakı MAKS aviasiya sərgisində “Su-57E” ixrac versiyasını incələməsi ilə başlamışdı. Həmin dövrün mətbuat xəbərlərində təxminən 2 milyard dollar dəyərində 14 təyyarəlik müqavilənin imzalandığı irəli sürülmüşdü.
Lakin müqavilə Rusiyanın seriyalı istehsal prosesindəki texniki problemlər və müştəri ehtiyaclarına görə avionika sistemlərinin uyğunlaşdırılması zərurəti səbəbindən dəfələrlə təxirə salınıb.
2023-2024-cü illər dövründə müqavilənin vəziyyəti qeyri-müəyyən olaraq qalarkən, Rusiya rəsmiləri yalnız “xarici bir müştəri” ifadəsini işlətməklə kifayətləniblər.
Potensial müştərilər
“Su-57E” üçün potensial alıcılar arasında Hindistan ilə Malayziya və İndoneziya kimi Cənub-Şərqi Asiya ölkələri ön plana çıxır. Bu ölkələr daha əvvəl Rusiya istehsalı döyüş təyyarələrinə maraq göstərib və hazırda “Su-30” ailəsinə aid platformaları inventarlarında saxlayırlar.
Bu tip müştərilər adətən çevik və üstünlüklü tədarük modelləri tələb edir. Belə ki, İndoneziya daha əvvəl 11 ədəd “Su-35” döyüş təyyarəsini 1,14 milyard dollar qarşılığında satın almağı planlaşdırmış, ödənişin bir hissəsini qəhvə, çay, kauçuk və palma yağı kimi əmtəələrlə barter üsulu ilə həyata keçirməyi nəzərdə tutmuşdu.
Bununla yanaşı, davam edən marağa baxmayaraq “Su-57E” üçün yeni ixrac müqavilələri rəsmi olaraq təsdiqlənməyib və əlavə müştərilərə dair ictimaiyyətə açıq dəqiq məlumat mövcud deyil.
Sevinc Əliyeva
Ordu.az
