Ordu.az xəbər verir ki, Solsberi düzənliyində yerləşən Bulford üzərindəki Beacon Hill yamacına həkk olunmuş Bulford Kivi Böyük Britaniya və Yeni Zelandiya silahlı qüvvələrinin, Müdafiə İnfrastruktur Təşkilatının (DIO) və Kral Hərbi Hava Qüvvələri personalının iştirakı ilə həyata keçirilən əməkdaşlıq çərçivəsində bərpa edilib.
Kral Hərbi Hava Qüvvələrinə məxsus “Chinook” helikopteri nəhəng təsvirin üzərinə 10 ton təbaşir töküb.
Kivi ilk dəfə 1919-cu ildə Birinci Dünya müharibəsinin başa çatmasından sonra Böyük Britaniyada yerləşdirilmiş Yeni Zelandiya Ekspedisiya Qüvvələrinin əsgərləri tərəfindən oyulub.
DIO-nun baş arxeoloqu Riçard Osqud bildirib: “DIO Müdafiə Nazirliyinin nəzarətində olan və tarixdən əvvəlki dövrdən Soyuq müharibə dövrünə qədər uzanan 772 qeydiyyata alınmış abidənin qorunmasına cavabdehdir.
Bulford Kivi ən gənc nümunələrdən biri olsa da, 1919-cu ildə yaradılmasına baxmayaraq, Yeni Zelandiya Silahlı Qüvvələri ilə bağlılığı səbəbindən milli və beynəlxalq əhəmiyyət daşıyır. Bu illik təbaşirlə yenilənmə ölkələrimiz arasında əlaqələri gücləndirir və Birinci Dünya müharibəsində verilmiş qurbanları xatırladır”.
Layihə Yeni Zelandiya Ali Komissarlığı, yerli mühafizə qrupları və “Landmarc” podratçısı daxil olmaqla geniş könüllü və tərəfdaş şəbəkəsini bir araya gətirib.
Böyük Britaniyanın Üçüncü Diviziya Rabitə Alayının könüllüləri və yaralı, xəsarət almış və xəstə hərbi qulluqçuların və veteranların reabilitasiyasına yönəlmiş arxeoloji qazıntılardan istifadə edən hərbi təşəbbüs olan “Operation Nightingale” də layihədə iştirak edib.
2011-ci ildə Solsberi düzənliyində başlayan “Operation Nightingale” təşəbbüsü veteranları və hərbi qulluqçuları arxeoloji qazıntılara cəlb etməklə narahatlıq və depressiya kimi problemlərlə mübarizəyə dəstək verir.
Könüllülər helikopterlə tökülmüş təbaşiri yamac üzərində yayaraq yerləşdiriblər.
Bərpa zamanı “Waiata” (ənənəvi Maori nəğməsi) və “Kukuri” rəqsi icra olunub.
Yeni Zelandiya Müdafiə Qüvvələri tərəfindən ifa olunan “Kukuri” rəqsi Maori haka ənənələri ilə Nepal qurxalarının ənənəvi rəqsini birləşdirir.
Bulford Kivi tarixdən əvvəlki dövrdən Soyuq müharibə dövrünə qədər uzanan 772 qeydiyyata alınmış abidədən biridir və DIO tərəfindən idarə olunur.
Sevinc Əliyeva
Ordu.az
