Ordu.az xəbər verir ki, bu barədə xarici KİV-lər məlumat yayıb.
O vurğulayıb ki, Çin bu qərarlar üzərində heç bir səlahiyyətə malik deyil.
Taypeydə keçiriləcək təhlükəsizlik forumu öncəsi yerli mediaya danışan Flinn qeyd edib ki, silah satışı yalnız ABŞ və Tayvan administrasiyası arasında məsələdir və Çinin hərəkətləri ilə bağlı deyil. O, Vaşinqton ilə Taypey arasında uzunmüddətli münasibətləri vurğulayaraq əlavə edib ki, Pekinin xüsusilə hərbi imkanlar və texnika ilə bağlı ABŞ- Tayvan administrasiyası münasibətlərində söz haqqı yoxdur.
Flinn bildirib ki, son on ildə Çinin hərbi genişlənməsi həm imkanlar, həm də modernizasiya baxımından heyrətamiz olub. O əlavə edib ki, bu inkişaflar 2014-2016-cı illər arasında başlanmış qoşun hazırlığındakı koordinasiyalı dəyişikliklərlə müşayiət olunub.
O, son iki onillikdə Çinin fəaliyyətlərini tədricən, gizli və məsuliyyətsiz kimi xarakterizə edərək, regiondakı tarazlığı dəyişmək üçün məcburetmə, hüquqi mübarizə və informasiya müharibəsindən istifadə edildiyini bildirib. Flinn xəbərdarlıq edib ki, Avropa və Yaxın Şərqdə davam edən münaqişələr fonunda Tayvan boğazında yeni regional müharibə qlobal qarşıdurmaya çevrilə bilər.
Flinn Tayvan administrasiyasının Çini təhrik etməməsi və ya hərbi investisiyalarını məhdudlaşdırması ilə bağlı fikirlərə cavab olaraq bildirib: “Şəri sakitləşdirmək mümkün deyil. Şər məğlub edilməlidir”. O qeyd edib ki, əhalinin, ərazi bütövlüyünün və milli suverenliyin qorunması Tayvan xalqının əsas məsuliyyətidir və hazırlıqlı olmaq hazırlıqsız olmaqdan daha yaxşıdır.
Flinn həmçinin ABŞ ordusunun məsafə və zərbə qabiliyyətinin qiymətləndirilməməli olduğunu vurğulayaraq “Midnight Hammer”, “Absolute Resolve” və “Epic Fury” kimi son əməliyyatları nümunə göstərib.
Hazırda “Palantir” şirkətində baş məsləhətçi kimi çalışan Flinn bildirib ki, Tayvan administrasiyasının öz pilotsuz uçuş aparatı sənayesini inkişaf etdirməsi və süni zəka dəstəyi ilə C5ISR sistemləri əldə etməsi müdafiəsi üçün çox vacibdir. Onun sözlərinə görə, süni zəka kəşfiyyat toplamağa, hədəfləri müəyyən etməyə, qüvvələri qorumağa və əməliyyatları davam etdirməyə kömək edə bilər.
Flinn ötən il Tayvana səfəri zamanı “Han Kuang 41” hərbi təlimlərini izlədiyini xatırladaraq bildirib ki, ön xətt şəxsi heyəti, ehtiyat qüvvələr və aktiv hərbçilərin iştirak etdiyi genişmiqyaslı səfərbərlik təlimləri Tayvan administrasiyasının hazırlıq metodlarında ciddi irəliləyiş göstərir və seçilmiş hökumətin dəstəyini nümayiş etdirir. Lakin o xəbərdarlıq edib ki, bu cür planlar real böhran şəraitində tələb olunan koordinasiya səviyyəsinə tam çatmaya bilər.
Tayvan administrasiyasının beynəlxalq birgə hərbi təlimlərdən kənarda qalması ilə bağlı suala cavab olaraq Flinn bildirib ki, yaradıcı yanaşmalarla, məsələn, regional tərəfdaşların Tayvanda təlim keçməsinə şərait yaratmaqla iştirak təmin edilə bilər. O, Tailandda keçirilən “Cobra Gold” təlimlərini nümunə göstərərək Çinin burada əsasən humanitar yardım və fəlakətlərin aradan qaldırılması üzrə iştirak etdiyini qeyd edib.
Flinn bildirib ki, düzgün yanaşma ilə Tayvan administrasiyasının bu əməkdaşlıqlara cəlb olunması mümkündür.
Sevinc Əliyeva
Ordu.az
