Ordu.az xəbər verir ki, bu barədə Seuldan olan deputat bazar günü bildirib.

Xalq Gücü Partiyasından deputat Yu Yonq-vonun sözlərinə görə, donanma “Chamsuri-325” və “Chamsuri-357” hərbi gəmilərinin bort nömrələrinin gələcəkdə inşa ediləcək “Patrol Killer Medium Rockets” (PKMR) tipli yeni gəmilərə ötürülməsi planını qiymətləndirir. PKMR-lər dəqiq yönləndirilən raketlərlə təchiz olunmuş yüksək sürətli patrul gəmiləridir.

“Chamsuri-325” və “Chamsuri-357” gəmiləri müvafiq olaraq 1999 və 2002-ci illərdə Yeonpyeonq adası yaxınlığında, Şimali Koreya patrul katerlərinin faktiki dəniz sərhədi sayılan Şimal Limit Xəttini keçdiyi zaman baş verən dəniz döyüşlərində iştirak edib.

Donanma bildirib ki, 1999-cu ildəki dəniz toqquşmasında istifadə edilən “Chamsuri-325” gəmisinin tarixi əhəmiyyətinə baxmayaraq, yüksək texniki xidmət xərcləri və nümayiş üçün bərpasının çətinliyi səbəbindən 2022-ci ildə istismardan çıxarıldıqdan sonra utilizasiya edilib. “Chamsuri-357” isə 2023-cü ildə istismardan çıxarıldıqdan sonra Kyonqqi vilayətinin Pyonqtək şəhərində yerləşən 2-ci Donanma muzeyində nümayiş etdirilir.

Yu bildirib ki, bu iki “Chamsuri” sinfinə məxsus gəminin “yenidən dirçəldilməsi” təkcə bort nömrələrinin ötürülməsi deyil, həm də qələbə irsinin qorunması və həlak olmuş vətənpərvərlərin xatirəsinin yad edilməsidir.

Sevinc Əliyeva
Ordu.az