Ordu.az xəbər verir ki, ROKETSAN Türkiyənin müdafiə və kosmik texnologiyalarında tam müstəqillik hədəfi istiqamətində istehsal, sınaq və elmi-tədqiqat və təcrübə-konstruktor işləri infrastrukturunu gücləndirən genişmiqyaslı investisiyalar həyata keçirir.
Bu investisiyalar istehsal gücünü artırmağı, milliləşdirmə işləri ilə kritik texnologiyalarda xaricdən asılılığı azaltmağı, yüksək əlavə dəyərli ixracı artıraraq Türkiyəyə iqtisadi və geosiyasi əlavə dəyər qazandırmağı və Türkiyə Silahlı Qüvvələrinin çəkindirmə və effektivlik imkanlarını daha yüksək səviyyəyə çatdırmağı hədəfləyir.
Bu çərçivədə 2026-cı il etibarilə istismara verilən və gücü artırılan yeni müəssisələr ROKETSAN-ın yalnız bir sursat istehsalçısı olmaqdan çıxaraq qlobal miqyasda müdafiə və kosmik texnologiyalar nəhənginə çevrilmə strategiyasına güc qatır.
ROKETSAN tərəfindən tamamlanan investisiyaların dəyəri 1 milyard dollar təşkil edir, davam edən 2 milyard dollarlıq yeni investisiyalarla birlikdə ümumi investisiya həcmi 3 milyard dollara çatır və ölkənin ən böyük müdafiə sənayesi investisiyaları həyata keçirilir.
Açılışı həyata keçiriləcək müəssisə və mərkəzlərdə 2 min nəfərin məşğulluğu təmin olunacaq. Təməli qoyulan “Lalahan” Raket İnteqrasiya Müəssisələrində isə 1300 nəfərin məşğulluğunun təmin edilməsi planlaşdırılır. Ümumilikdə 3300 nəfər işlə təmin olunacaq.
Açılışı həyata keçiriləcək müəssisələr
“Kırıkkale” Yanacaq İstehsal Müəssisələri
“Kırıkkale” Yanacaq İstehsal Müəssisələrində iri çaplı sursatların sınaq proseslərinin və kritik yanacaq texnologiyalarının yerli imkanlarla hazırlanması və istehsalı təmin olunacaq. 2500 hektar ərazidə inşa edilən müəssisənin ümumi investisiya dəyəri 450 milyon dollardır. Müəssisə 52.000 m² qapalı sahəyə və ümumilikdə 83 tikiliyə malikdir.
Struktur bölgü:
İstehsal və elmi-tədqiqat və təcrübə-konstruktor işləri: 24 istehsal binası.
Sınaq sahələri: 2 açıq sınaq sahəsi.
İnzibati və sosial sahələr: 5 ofis və sosial obyekt.
Logistika və infrastruktur: 5 anbar və 46 infrastruktur dəstək binası.
“Lalahan” Döyüş Başlığı Müəssisəsi
Mövcud döyüş başlığı istehsal gücünün artırılması və əməliyyat proseslərinin sürətləndirilməsi hədəflənən bu müəssisə Avropanın ən böyük döyüş başlığı müəssisəsidir. Müəssisənin investisiya dəyəri 350 milyon dollardır. İnteqrasiya bölmələri ilə birlikdə 21.000 m² qapalı sahəyə və 26 tikiliyə malikdir.
İstehsal müəssisələri: 10 istehsal zalı.
Saxlama bölmələri: 3 anbar.
İnzibati sahələr: 3 ofis binası.
İnfrastruktur və dəstək tikililəri: 10 ədəd (nəzarət-buraxılış məntəqələri, transformator mərkəzləri və su anbarları).
N-26 Qabaqcıl Texnologiyalar Elmi-Tədqiqat və Təcrübə-Konstruktor İşləri və Mühəndislik Mərkəzi
100 milyon dollar investisiya dəyəri ilə inşa edilən, 1000 nəfərlik ofis və mühəndislik potensialına malik olan bu obyekt 30.000 m² qapalı sahə daxilində qabaqcıl texnologiyalar üzrə elmi-tədqiqat laboratoriyalarının və qabaqcıl mühəndislik fəaliyyətlərinin həyata keçiriləcəyi bir mərkəzdir.
1000 nəfərlik: ofis və mühəndislik potensialı
30.000 m² qapalı sahə
Qabaqcıl texnologiyalar üzrə elmi-tədqiqat laboratoriyaları
Tamamlanan müəssisələrin elmi-tədqiqat və infrastruktur fəaliyyəti üçün 100 milyon dollar investisiya yatırılıb.
Təməli qoyulacaq müəssisələr
“Lalahan” Raket İnteqrasiya Müəssisələri
Tamamlandıqda təxminən 72.000 m² qapalı sahəyə malik 18 tikilidən ibarət olacaq “Lalahan” Raket İnteqrasiya Müəssisələri ilə ROKETSAN-ın iri miqyaslı inteqrasiya müəssisələri üçün artan istehsal həcmini qarşılayacaq infrastruktur formalaşdırılır. Bu investisiya ilə seriyalı istehsal xətlərinin istehsal gücü 5 dəfə artırılacaq.
Müəssisənin detalları:
Əsas inteqrasiya binaları: Ballistik Sistemlər, Taktiki Raket Sistemləri və Qanadlı Raket Sistemləri Baş direktor müavinlikləri olmaqla ümumilikdə 47.000 m² istehsal sahəsi.
Logistika və saxlama: Logistika İnert Anbarı və 4 ədəd MCM anbarı.
İnfrastruktur və dəstək tikililəri: infrastruktur dəstək binaları, əsas nəzarət-buraxılış məntəqəsi və avtomobil dayanacağı sahələri.
Təhlükəsizlik və ətraf mühit: patrul yolu və təhlükəsizlik divarı tikintisi.
Bu investisiyalar eyni zamanda ölkənin müdafiə qabiliyyətləri baxımından kritik əhəmiyyətə malik sistemlərin seriyalı istehsal sürətini dəfələrlə artıracaq. Xüsusilə uzun mənzilli bölgə hava hücumundan müdafiə sistemləri və raketdən müdafiə sistemi SİPER, HİSAR hava hücumundan müdafiə raketləri və TAYFUN raketi kimi ölkənin müdafiəsində kritik əhəmiyyətə malik sistemlərin seriyalı istehsalını inkişaf etdirəcək infrastruktur bu müəssisələrlə təmin olunur. ROKETSAN tərəfindən həyata keçirilən bu investisiyalar,
“Polad Günbəz” layihəsinin əsas paydaşlarından biri və zərbə gücü olaraq Türkiyənin bütün təbəqələrdəki hava hücumundan müdafiə ehtiyacını milli həllərlə qarşılamaq istiqamətində işlərə sürət qazandıracaq.
Türkiyənin ən uzun mənzilli ballistik raketi TAYFUN-un hipersəs versiyası BLOK-4 başda olmaqla bütün raketlərin mənzilini artıraraq Türkiyə Silahlı Qüvvələrinin effektivlik və çəkindirmə gücünü artıracaq.
RDX və HMX kimi partlayıcı və kritik xammal istehsal müəssisələri ilə bu sahədə xaricdən asılılığı azaldaraq mümkün embarqo risklərinə qarşı güclü yerli istehsal infrastrukturu formalaşdırılmasına töhfə verəcək.
Davam edən investisiyalarla ümumi investisiya həcmi 3 milyard dollar səviyyəsinə çatacaq.
ROKETSAN-ın təchizat zənciri
Hazırkı məqamda ROKETSAN
2300-dən çox şirkətlə geniş təchizat zənciri ekosistemi formalaşdıraraq Türkiyənin ən böyük sənaye qurumlarından birinə çevrilib.
Tam müstəqil müdafiə sənayesi hədəfi ilə milliləşdirmə səviyyəsini 90 faiz həddinə çatdırıb.
İxrac yönümlü böyümə strategiyası ilə Asiyadan Amerikaya, Avropadan Yaxın Şərqə qədər Türkiyə bayrağını dalğalandıran və dövriyyəsinin 38 faizdən çoxunu ixracdan əldə edən dünyanın ən böyük 100 müdafiə sənayesi şirkətindən biri mövqeyinə yüksəlib.
Dünyanın müxtəlif bölgələrində formalaşdırdığı strateji iş ortaqlıqları ilə texnologiya ixrac edən, ortaq istehsal həyata keçirən və ölkənin qlobal təsirini gücləndirən beynəlxalq bir şirkətə çevrilib.
ROKETSAN-ın həyata keçirdiyi bu investisiyalar Türkiyənin müdafiə sənayesində yerli və milli texnologiyalara əsaslanan güclü ekosistem formalaşdırmaq hədəfinin mühüm hissəsini təşkil edir. Ölkənin çəkindirmə qabiliyyətini, texnoloji səriştəsini və qlobal rəqabət gücünü irəli daşıyan ROKETSAN qabaqcıl texnologiyalar ehtiva edən sistemləri sürətli və maya dəyəri baxımından səmərəli şəkildə hazırlamaq qabiliyyəti ilə ölkəyə yüksək əlavə dəyərli istehsal və ixrac qazandırmağa davam edir.
Sevinc Əliyeva
Ordu.az
