Ordu.az xəbər verir ki, təkliflər 2026-cı il aprelin 20-dək təqdim edilməlidir.
Bu təşəbbüs ölkənin Sursat Sənaye Bazasının modernləşdirilməsini və dayanıqlığını təmin etməyə yönəlib. Son illərdə adi sursatlara artan tələbatın istehsal müəssisələri və təchizat zəncirləri üzərində təzyiq yaratdığı vurğulanır.
Yeni müqavilə çərçivəsində sistemdəki zəif nöqtələrin müəyyənləşdirilməsi, istehsal proseslərinin təkmilləşdirilməsi və ABŞ üzrə müxtəlif istehsal müəssisələrində uzunmüddətli modernləşmənin dəstəklənməsi planlaşdırılır.
ABŞ ordusu həm dövlətə məxsus, həm də kommersiya sursat istehsalı müəssisələrində fəaliyyət göstərə biləcək podratçılar axtarır və əsas məqsədin “sursat sənaye bazasının davamlılığını təmin etmək və daha yüksək effektivlik əldə etmək” olduğu qeyd olunur.
Tender çoxsaylı podratçılar üçün açıq olan qeyri-müəyyən çatdırılma/qeyri-müəyyən həcm (IDIQ) modeli əsasında təşkil olunub. Bir neçə şirkət seçilərək zamanla ayrı-ayrı tapşırıqlar üzrə layihələrə cəlb edilə bilər. Müqavilənin ümumi maksimum dəyəri 44.622.496,68 dollar, müddəti isə 5 il müəyyən edilib.
Seçiləcək podratçılar istehsal proqramlarının idarə olunması, zavod performansının təhlili və köhnəlmiş infrastrukturun modernləşdirilməsi üzrə məsləhət xidmətləri göstərəcək.
Bununla yanaşı, xərc-fayda təhlilləri, risk qiymətləndirmələri və texniki araşdırmalar aparılacaq, sistemin daha səmərəli işləməsi üçün qərar qəbuletmə proseslərinə dəstək veriləcək.
Tender sənədinə əsasən podratçılar həmçinin həssaslıq təhlilləri, əsas səbəb araşdırmaları və risk qiymətləndirmələri aparacaq, hazırlanan hesabatlarda həm səmərəlilik, həm də uzunmüddətli dəyər yaradılması təhlil ediləcək.
Bu işlər eyni zamanda ABŞ müdafiə istehsalını müttəfiq sənaye strukturları ilə inteqrasiya edən Milli Texnologiya və Sənaye Bazası çərçivəsində həyata keçirilən təşəbbüslərlə əlaqələndiriləcək.
İlk tapşırıqlar müqavilə imzalandıqdan sonra veriləcək və hər bir tapşırıq üzrə tələblər, vaxt cədvəli və nəticələr federal satınalma qaydalarına uyğun müəyyən ediləcək.
ABŞ ordusu təklifləri ümumi dəyər yanaşmasına əsasən qiymətləndirəcək və bu, bir və ya bir neçə podratçı ilə əməkdaşlıq imkanını nəzərdə tutur.
Sursat Sənaye Bazası artilleriya sursatlarından tutmuş yüngül silah döyüş sursatlarına qədər geniş sahəni əhatə edən istehsal, anbar və dəstək sistemlərindən ibarətdir və həm təlim, həm də döyüş əməliyyatları üçün kritik əhəmiyyət daşıyır.
Sevinc Əliyeva
Ordu.az
