Ordu.az xəbər verir ki, bu barədə İspaniyanın "20 minutos" nəşrində məqalə yayımlanıb.
Nəşr qeyd edib ki, Ermənistan və Azərbaycan təkcə diplomatik sahədə deyil, həm də infrastruktur sahəsində münasibətlərin normallaşdırılması istiqamətində addımlar atmağa davam edir.
Xüsusən də, iyunun 22-də "Telecom Armenia" və "AzerTelecom" hər iki ölkənin ərazisindən internet trafikinin tranzitinə dair saziş imzalayıblar. Bundan əlavə, iyunun 21-də Azərbaycan Ermənistana 17 vaqon (1000 ton) dizel yanacağı ixrac edib.
Məqalədə qeyd edilib ki, internet trafikinin tranziti, neft məhsullarının tədarükü və digər əməkdaşlıq formaları sadəcə bəyanat xarakterli deyil, münasibətlərin real şəkildə normallaşmasının əlamətləridir. Lakin nəşrin fikrincə, bu, tamhüquqlu sülh sazişinin bağlanması üçün kifayət deyil.
"Ermənistan öz Konstitusiyasını dinc yanaşı yaşamağa dair reallıqlara uyğunlaşdırmalıdır. Əsas maneə qüvvədə olan Konstitusiyanın preambulasıdır ki, burada Ermənistan və Qarabağın birləşməsini nəzərdə tutan sənədə - "Müstəqillik Bəyannaməsi"nə istinad yer alır", - materialda vurğulanıb.
Eyni zamanda qeyd olunub ki, Ermənistanın Baş naziri Nikol Paşinyan konstitusiya islahatının və revanşist istəklərdən imtina edilməsinin tərəfdarıdır, lakin iyunun 7-də keçirilən seçkilərdən sonra o, konstitusiya çoxluğuna malik deyil və digər siyasi qüvvələrin dəstəyini axtarmağa məcburdur.
"Seçkilərdə ikinci yerdə (23,29 % səs) Samvel Karapetyanın "Güclü Ermənistan" partiyası, üçüncü yerdə isə təqribən 10 % səslə Robert Köçəryanın rəhbərlik etdiyi "Ermənistan" bloku qərarlaşıb. Hər iki siyasi qüvvə açıq şəkildə Rusiya yönümlü mövqeləri təmsil edir və Moskvanın maraqlarını irəli sürür. Onların məqsədi ölkəni yenidən Kremlin orbitinə qaytarmaq və Cənubi Qafqazda dayanıqlı sülhə doğru istənilən kursu əngəlləməkdir", - materialda qeyd olunub.
Məqalədə ayrıca olaraq, sülh prosesləri çərçivəsində münaqişələrdən sonra konstitusiya müddəalarının dəyişdirilməsinə nümunə kimi İrlandiya, Şimali Makedoniya və Almaniya daxil olmaqla, Avropa təcrübəsinə istinad edilib.
"Ermənistanın siyasi isteblişmentindəki revanşistlər qüvvədə olan Konstitusiyanın preambulasından yeni regional eskalasiyaya haqq qazandırmaq üçün istifadə edə bilərlər. Daha sonra onlar Ermənistan qanunvericiliyində bu cür hərəkətlər üçün guya hüquqi bazanın mövcud olması barədə tezis irəli sürə bilərlər", - məlumatda vurğulanıb.
Nəşrin qiymətləndirməsinə görə, sülh prosesi çərçivəsində Ermənistan Konstitusiyasının dəyişdirilməsi beynəlxalq təcrübə üçün istisna və ya presedent deyil: "Göstərilən nümunələri nəzərə alaraq, Ermənistandakı konstitusiya islahatına güzəşt kimi deyil, Azərbaycanla sülh prosesinin zəruri hüquqi yekunu kimi baxılmalıdır. Nə qədər ki, əsas qanunda mübahisə yarada biləcək ifadələr qalacaq, bütün regionun sabitliyi və rifahı üçün təhlükə sovuşmayacaq".
Ordu.az
