Ordu.az xəbər verir ki, bu barədə Çinin dövlət televiziyası CCTV məlumat yayıb.
Məlumata görə, Yaponiyanın hərbi gəmiləri və təyyarələri Çinə məxsus “Liaoning” aviadaşıyıcısının Cənubi Çin dənizi və Qərbi Sakit okeanda 40 günlük missiyası zamanı ona qarşı simulyasiya edilmiş hücumlar həyata keçiriblər. 2026-cı il iyunun 22-də başa çatan missiyadan sonra CCTV Yaponiyanın bu hərəkətlərini “qəbuledilməz dərəcədə həyasız” adlandırıb.
İlk dəfə CCTV-nin şərhçisi Ten Tsyanqun tərəfindən səsləndirilən və “Global Times” tərəfindən yayılan bu iddia Pekinin Yaponiyanın müşahidə fəaliyyətinə münasibətində ritorikanın daha da sərtləşdiyini göstərir. Çin Yaponiya Dəniz Özünümüdafiə Qüvvələrinin adi müşahidə fəaliyyətini əvvəlki missiyalarla müqayisədə keyfiyyətcə fərqli və daha təhlükəli addım kimi qiymətləndirir.
Yaponiyanın Birləşmiş Qərargahı isə bu iddiaları qətiyyətlə təkzib edərək bildirib ki, bu cür açıqlamalar həqiqəti əks etdirmir və Özünümüdafiə Qüvvələri təhlükəsizliyi əsas prioritet hesab etməklə peşəkar müşahidə əməliyyatları həyata keçirir.
USNI News-un təsdiqlədiyi məlumata görə, iyunun 22-də Tsinqdaodakı əsas bazasına qayıdan “Liaoning” aviadaşıyıcı zərbə qrupu beş gəmidən ibarət olub. Qrupa CNS “Liaoning” (16), CNS “Wuxi” (104), CNS “Kaifeng” (124), CNS “Luohe” (545) və CNS “Hulunhu” (901) daxil idi.
Donanma 40 günlük missiya ərzində Cənubi Çin dənizi və Filippin dənizində fəaliyyət göstərib. Çin Müdafiə Nazirliyi bildirib ki, bu müddətdə sahil və dəniz qüvvələrinin inteqrasiya edilmiş əməliyyatları, aviadaşıyıcı əsaslı taktiki uçuşlar, donanmanın axtarış-xilasetmə və digər təlimləri icra olunub.
Çin dövlət mediası həmçinin təsdiqləyib ki, bu missiyada avionik, radar və silah inteqrasiyası baxımından modernləşdirilmiş yeni iki mühərrikli J-15T döyüş təyyarəsi də iştirak edib.
“Defence Blog”un məlumatına görə, J-15T “Flanker” platforması əsasında hazırlanmış və katapult sistemi ilə buraxılış üçün optimallaşdırılmış variantdır. Təyyarə “Type 003 Fujian” aviadaşıyıcısında istifadə olunan elektromaqnit buraxılış sistemi üçün yenidən layihələndirilib.
Bununla yanaşı, J-15T-nin tramplinli “Liaoning” aviadaşıyıcısında görünməsi onun artıq ənənəvi qalxma üsulu ilə də istifadəyə hazır olduğunu və Çinin mövcud aviadaşıyıcı donanmasının əməliyyat çevikliyini artırdığını göstərir.
2025-ci ilin dekabrında “Liaoning”dən havaya qalxan iki J-15 qırıcısının atış idarəetmə radarlarını Yaponiyanın F-15 qırıcılarına yönəltməsi beynəlxalq səviyyədə diqqət çəkmişdi. Həmin vaxt Yaponiyanın müdafiə naziri Sindziro Koidzumi bunu “uçuş təhlükəsizliyi sərhədlərini aşan təhlükəli addım” adlandırmışdı.
CCTV-nin iddiasına görə, Yaponiya gəmilərinin və təyyarələrinin Çin donanmasına həddindən artıq yaxınlaşması əvvəlki dövrlərlə müqayisədə ciddi dəyişiklikdir. Şərhçi Ten Tsyanqun bildirib ki, Yaponiya eyni vaxtda Yaponiya mediasında “hədəfli simulyasiya hücumları” kimi təqdim edilən fəaliyyətlər həyata keçirib.
Çin Müdafiə Nazirliyinin sözçüsü Can Syaoqan iyunun 26-da keçirilən brifinqdə bildirib ki, Pekin Yaponiyanı Çinin normal hərbi təlimlərinə mane olan bu təhlükəli hərəkətlərə son qoymağa çağırır.
Sevinc Əliyeva
Ordu.az
